ირაკლი კობახიძე: ჩვენ ვმონაწილეობდით მოლაპარაკებებში, სადაც დავინახეთ სამზე მეტი ღირსეული ადამიანი

„ჩვენ ვმონაწილეობდით მოლაპარაკებებში და ჩვენ დავინახეთ სამზე მეტი ღირსეული ადამიანი“, - ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ პარტიის ოფისში გამართულ პრესკონფერენციაზე განაცხადა. მან დეტალებზე არ ისაუბრა და აღნიშნა, რომ მმართველი გუნდის ამოცანაა, პარლამენტში ჯანსაღი პოლიტიკური პარტიები იყვნენ წარმოდგენილი.

„სააკაშვილი, გვარამია, ბოკერია, უგულავა - ისინი არიან ოდიოზური, პათოლოგიური პოლიტიკოსები და ვინც ამ სახეებთან არ არის დაკავშირებული და ასოცირებული რაიმე ფორმით, ესენი არიან ჯანსაღი პოლიტიკოსები და პოლიტიკური ძალები. მათი ადგილი არის პარლამენტში, მაგრამ ვინც ასოცირებულია ამა თუ იმ ფორმით, ასეთ არაჯანსაღ პოლიტიკოსებთან, მათი ადგილი პარლამენტში არ არის“, - განაცხადა ირაკლი კობახიძემ.

„ქართულ ოცნებასა“ და ოპოზიციას შორის მოლაპარაკებების მეხუთე რაუნდი დღეს აღარ გაიმართება.

მმართველი გუნდი იმედოვნებს, რომ მიუხედავად ზოგიერთი ოპოზიციონერის მცდელობისა, ჩაშალონ მოლაპარაკებები, მხარეები შეთანხმდებიან.

ოპოზიცია კი მოთხოვნებს არ ცვლის. ისინი, მოთხოვნების შეუსრულებლობის შემთხვევაში, პარლამენტში შესვლას გამორიცხავენ. მოლაპარაკების ჩაშლისა და საბოტაჟის სურვილში ამხილა ალეკო ელისაშვილმა „ევროპული საქართველო“.