დავით ბაქრაძე: დავწერე განცხადება, რომ პარლამენტიდან გამოვდივარ, პარალელურად „ევროპულმა საქართველომ“ ცესკოს სიების გაუქმების მოთხოვნით მიმართა

მე, როგორც ინდივიდუალურმა დეპუტატმა, დავწერე განცხადება, რომ პარლამენტიდან გამოვდივარ, მაგრამ ასეთ შემთხვევაში, პარტიიდან შემდეგი რომ არ შევიდეს და საზოგადოება არ მოვატყუოთ, ჯერ უნდა ჩაიხსნას პარტიული სია და შემდეგ უნდა გამოვიდნენ ცალკეული დეპუტატები, - ამის შესახებ ტვ. პირველის ეთერში „ევროპული საქართველოს“ ერთ-ერთმა ლიდერმა დავით ბაქრაძემ განაცხადა.

ბაქრაძის განცხადებით ეს პროცესი უკვე დაიწყო და „ევროპულმა საქართველომ“ ცენტრალურ საარჩევნო კომისიას სიების გაუქმების მოთხოვნით მიმართა. „სიები ჩაიხსნება და ვინც დავრჩით პარლამენტში, ხვალ უკვე ისინი შევიტანთ განცხადებას“, - აღნიშნა ბაქრაძემ.

მისი თქმით, პარლამენტში არ შესვლა არის ტერმინი, თუმცა აქ მთავარია გამოსვლის პროცედურა, რომელსაც თავისი წესი აქვს. „პროცედურა ასეთია, პარლამენტმა ცნო 150 დეპუტატის უფლებამოსილება და შემდეგ ვისაც არ უნდა პარლამენტში ყოფნა უნდა დაწეროს განცხადება და გამოვიდეს. ვინც არ დაწერს განცხადებას პარლამენტიდან გამოსვლის შესახებ, მას არ შეუწყდება დეპუტატის უფლებამოსილება. თუ არ მივა პარლამენტში, ეს ნიშნავს იმას, რომ უბრალოდ აცდენს სხდომას. ზოგიერთი დეპუტატი ამით მანიპულირებს, არ შევდივარ მაგრამ განცხადებას არ ვწერ, ასეთი პროცედურა არ არსებობს“, - აღნიშნა ბაქრაძემ.

მისი თქმით, პარლამენტში არშესვლის თემა მას შემდეგ დაიხურა რაც 150 დეპუტატის უფლებამოსილება ცნეს. „ახლა თემაა, ვინ გამოდის პარლამენტიდან და ვინ რჩება. ახლა ორი პროცესი მიდის, ერთია სიების ჩახსნა და და მეორე პარლამენტიდან გამოსვლა“, - განაცხადა ბაქრაძემ.

5-მა ოპოზიციურმა პარტიამ დეპუტატის მანდატზე უარის თქმისა და საარჩევნო სიების ჩახსნის შესახებ დოკუმენტები გააფორმა. ოპოზიციის მიერ მომზადებული დოკუმენტების ხელმისმოწერის პროცესს არ დასწრებიან პარტიები: „გირჩი“, „რესპუბლიკური პარტია“ და „ალეკო ელისაშვილი - მოქალაქეები“. „გირჩი“ და "რესპუბლიკური პარტია" აცხადებენ, რომ პარლამენტში არ შედიან და დეპუტატის მანდატზე უარს ამბობენ, უბრალოდ ამის დამადასტურებლად ცერემონიებში მონაწილეობის საჭიროებას ვერ ხედავდნენ.