იაგო ხვიჩია: ჩვენი სლოგანი იყო „გირჩი“ პარლამენტში, ახლა რომ ვთქვა შესვლა არ მინდა, ეს დესტრუქცია იქნება, მაგრამ თუ 113 დეპუტატი არ იქნება პარლამენტში არ შევალთ

მე რომ ორი დღის შემდეგ დავწერო ან სამი დღით ადრე დამეწერა განცხადება პარლამენტიდან გამოსვლაზე ან ერთი კვირით ადრე რა მოხდებოდა...ეგ ხო შანტაჟია, რომ მე რადგან დღეს დავწერე განცხადება შენც დღეს დაწერეო. ზეგ რომ დავწერო? ეს პროცესი კიდევ კარგახანს გაგრძელდება - ამის შესახებ „გირჩის“ ერთ-ერთმა ლიდერმა იაგო ხვიჩიამ ტვ. „პირველის“ ეთერში განაცხადა.

მისი თქმით, პარტიის სლოგანი საარჩევნოდ იყო „გირჩი“ პარლამენტში. „ახლა რომ ვთქვა იქ შესვლა არ მინდა, ეს დესტრუქცია იქნება. საჯაროდ ვამბობ, რომ თუ პარლამენტში 113 დეპუტატი არ იქნება, „გირჩი“ არ შევა“, - აღნიშნა იაგო ხვიჩიამ.

ხვიჩიას განცხადებით, ძალიან ბევრი ადამიანია ქართულ პოლიტიკაში, რომლებიც გარიგებებში შესულან და ერთმანეთი გადაუგდიათ. „გირჩში“ ამ მხრივ არის პოლიტიკურად უმწიკვლო ხალხი. „მე არავინ არ გადამიგდია და ყველა ჩემი სიტყვა შესრულებული მაქვს“, - განაცხადა ხვიჩიამ.

5-მა ოპოზიციურმა პარტიამ დეპუტატის მანდატზე უარის თქმისა და საარჩევნო სიების ჩახსნის შესახებ დოკუმენტები გააფორმა. ოპოზიციის მიერ მომზადებული დოკუმენტების ხელმისმოწერის პროცესს არ დასწრებიან პარტიები: „გირჩი“, „რესპუბლიკური პარტია“ და „ალეკო ელისაშვილი - მოქალაქეები“. „გირჩი“ და "რესპუბლიკური პარტია" აცხადებენ, რომ პარლამენტში არ შედიან და დეპუტატის მანდატზე უარს ამბობენ, უბრალოდ ამის დამადასტურებლად ცერემონიებში მონაწილეობის საჭიროებას ვერ ხედავდნენ.

პროპორციული საარჩევნო სიის ანულირების მოთხოვნით, ცენტრალურ საარჩევნო კომისიას ამ დროისათვის ხუთმა ოპოზიციურმა ძალამ მიმართა, ესენია: „ერთიანი ნაციონალური მოძრაობა - ძალა ერთობაშია”, „ევროპული საქართველო”, „ლეიბორისტული პარტია”, „სტრატეგია აღმაშენებელი” და „ლელო საქართველოსთვის“.