ნიკოლოზ სამხარაძე: გრიგოლ ვაშაძემ გადაწყვიტა, ის ხომალდი, რომელიც იძირება დროზე ადრე დატოვოს

გრიგოლ ვაშაძის განცხადება ცხადყოფს, რომ ოპოზიციაში არის განხეთქილება და შიდა დაძაბულობა, - ამის შესახებ პარლამენტის საგარეო საქმეთა კომიტეტის თავმჯდომარემ, ნიკოლოზ სამხარაძემ ბრიფინგზე განაცხადა.

„მიუხედავად იმისა, რომ ის არის ჩვენი ოპონენტი, ბატონი ვაშაძე არის გამოცდილი დიპლომატი და პოლიტიკოსი. შესაბამისად ის ძალიან კარგად ხვდება, რომ ის თავდასხმები და ისტერია, მართლაც ანტიდასავლური, ანტიამერიკული და ანტიევროპული ისტერია, რომელიც ელჩების მიმართ განხორციელდა, არის ჩიხი, ეს არის გზა არსაიდ, შესაბამისად ბატონმა ვაშაძემ, რომელიც ოპოზიციურ სპექტრში ყველაზე გამოცდილი დიპლომატია, გადაწყვიტა, რომ ის ხომალდი, რომელიც იძირება, დროზე ადრე დატოვოს“, - განაცხადა ნიკოლოზ სამხარაძემ.

გრიგოლ ვაშაძემ „ნაციონალური მოძრაობა“ დატოვა.

„ვერ შევეგუები, რომ პარტიის გარშემო და მის შიგნითაც გამოჩნდნენ ისეთი ოდიოზური ფიგურები, რომლებიც ჩვენ კარგა ხანია, თითქოს და ჩავაბარეთ წარსულს და, რომლებთან ერთად ვერასდროს, ვიმეორებ, ვერასდროს ვერ მოვიპოვებთ ამომრჩევლის ნდობას“, – წერს გრიგოლ ვაშაძემ.

გრიგოლ ვაშაძემ სოციალურ ქსელში დაწერა, რომ შეუძლებელია ღრმა აღშფოთებას არ იწვევდეს ჩვენი სტრატეგიული მოკავშირეების დიპლომატიური მისიების ხელმძღვანელთა წინააღმდეგ გაჩაღებული თავდასხმებისა და შეურაცხყოფის კამპანია.