ნათია თურნავა: ორმაგი სტანდარტები მიუღებელია ჩემთვის, როგორც ქალისთვის და როგორც მთავრობის წევრისთვის

ორმაგი სტანდარტებიც მიუღებელია ჩემთვის, როგორც ქალისთვის და როგორც მთავრობის წევრისთვის, - ამის შესახებ ნათია თურნავამ საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა, როცა მას თეა წულუკიანის ბოლო განცხადებების შესახებ დაუსვეს კითხვა.

„მე პირადად არ მომისმენია ქალბატონი თეას განცხადებები, მაგრამ მე მაქვს მოსმენილი სხვა განცხადებები - სიძულვილის ენა, რომელიც ქალბატონი თეას წინააღმდეგ იყო გამოყენებული, რასაც აბსოლუტურად ვემიჯნები და არის მიუღებელი“, - აღნიშნა ეკონომიკის მინისტრის მოვალეობის შემსრულებელმა.

მან კომენტარი იუსტიციის ყოფილი მინისტრის კიდევ ერთ განცხადებაზეც გააკეთა, რომელიც წულუკიანმა ტელეკომპანია „რუსთავი 2-თან“ დაკავშირებით გააკეთა. კერძოდ, წულუკიანმა აღნიშნა, რომ ტელეკომპანიის მფლობელის შეცვლა „ქართული ოცნების“ დამსახურებაა.

„მე შემიძლია ზოგადი კომენტარით შემოვიფარგლო. ერთი, რომ ბიზნესის თავისუფლება, ადამიანების თავისუფლება, მედიის თავისუფლება მოიტანა ამ ქვეყანაში „ქართულმა ოცნებამ“ 2012 წელს და ეს არის მოცემულობა და ეს არის ფაქტი. დანარჩენი ზოგადი სპეკულაციაა“, - განაცხადა თურნავამ.