ISFED-ის ბორდის წევრი ბაია პატარაია: კომუნიკაციაში დაშვებული შეცდომები და დაგვიანებული კომუნიკაცია ისეთი შეცდომაა, რომელიც უკვე აყენებდა აღმასრულებელი დირექტორის პასუხისმგებლობის საკითხს

ISFED-ის ბორდის წევრის, ბაია პატარაიას განცხადებით, ელენე ნიჟარაძე თანამდებობიდან ორგანიზაციის წევრების საერთო კონსენსუსის საფუძველზე წავიდა.

მისივე თქმით, პროცესში დაშვებული იყო ისეთი შეცდომები, რომლებიც ორგანიზაციის აღმასრულებელი დირექტორის პასუხისმგებლობის საკითხს აყენებდა.

„კომუნიკაციაში დაშვებული შეცდომები და დაგვიანებით განხორციელებული კომუნიკაცია არის ისეთი შეცდომა, რომელიც უკვე აყენებდა აღმასრულებელი დირექტორის პასუხისმგებლობის საკითხს უშუალოდ გამგეობისთვის. დღეს ელენე ნიჟარაძე აღმასრულებლი დირექტორის თანამდებობას აღარ იკავებს. ეს კონსულტაციები ძალიან ფართოდ მიმდინარეობდა ელენესთან, გამგეობა მსჯელობდა ამაზე. ამ პროცესში ჩართული იყვნენ ISFED-ის თანამშრომლები და დამკვირვებლები. ეს იყო კონსენსუსი ამ დიდი ჯგუფის. ელენე ნიჟარაძე აცხადებდა, რომ ის მზად არის აიღოს პასუხისმგებლობა და გადადგეს თანამდებობიდან, თუ ბორდი მიიჩნევს, რომ ეს არის გამოსავალი ამ მდგომარეობიდან და თუ ასეთ მძიმე შეფასებას მისცემდა ბორდი მის მმართველობას. რეალურად, ეს იყო კონსენსუსური გადაწყვეტილება. ამ აზრს იზიარებდა როგორც გამგეობა, ისე ISFED-ის უფრო დიდი გუნდი. გამგეობისათვის ამ ხარვეზის არსებობის შესახებ ცნობილი გახდა 11 დეკემბერს. 12 დეკემბერს გამგეობამ უკვე შექმნა სპეციალური კომისია,რომელიც შეისწავლიდა ხარვეზს“, - განაცხადა პატარაიამ.

პატარაია ასევე გამოეხმაურა განცხადებებს იმის შესახებ, რომ ეს ყველაფერი ორგანიზიაციას შესაძლოა, წინასწარ ჰქონოდა დაგეგმილი.

„ძალიან წუხს ყველა თანამშრომელი, რომ ეს შეცდომა მოხდა. გამორიცხულია ეს ყოფილიყო დაგეგმილი იმიტომ, რომ ამან ძალიან დიდი ზიანი მიაყენა 25-წლიან უნაკლო რეპუტაციის მქონე ორგანიზაციას. აბსოლუტურად ზედმეტია იმაზე ლაპარაკი, რომ ეს შეიძლება ორგანიზაციის ინტერესში შედიოდეს“, - განაცხადა პატარაიამ.

„სამართლიანმა არჩევნებმა“ (ISFED) 2020 წლის 31 ოქტომბრის არჩევნების საბოლოო შედეგების დაზუსტებულ ინფორმაცია გამოაქვეყნა. სამართლიანი არჩევნებისა და დემოკრატიის საერთაშორისო საზოგადოება განმარტავს, რომ 31 ოქტომბრის არჩევნების პარალელური დათვლის შიდა აუდიტის შედეგებმა დაადასტურა PVT მეთოდოლოგის სიზუსტე და დამკვირვებლების მიერ მოწოდებული ინფორმაციის სანდოობა, თუმცა, გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში. კერძოდ, საარჩევნო სუბიექტების მიერ მიღებულ ხმებთან ერთად, დაითვალეს ბათილი ბიულეტენებიც, რისი გასწორების შედეგადაც საარჩევნო სუბიექტების მიერ მიღებული ხმების პროცენტული რაოდენობა უმნიშვნელოდ შეიცვალა.

აღსანიშნავია, რომ ელენე ნიჟარაძემ „სამართლიანი არჩევნების“ აღმასრულებელი დირექტორის თანამდებობა დატოვა.