ირაკლი კობახიძის განცხადებით, სავარაუდოდ, თებერვალ-მარტში პარლამენტში სამზე მეტი პარტია იქნება

ჩვენი ვარაუდია, რომ უკვე თებერვალ-მარტში პარლამენტი არ იქნება არც ერთპარტიული, არც ორპარტიული, არც სამპარტიული. იქნება სამზე მეტი, - ამის შესახებ საპარლამენტო უმრავლესობის ლიდერმა, ირაკლი კობახიძემ გადაცემა „ღამის კურიერში“ განაცხადა.

რამდენ პოლიტიკურ სუბიექტს ელოდებით 2021-ში პარლამენტში? - ამ კითხვით წამყვანმა მიმართა.

ირაკლი კობახიძის თქმით, ხელისუფლების მხრიდან ოპოზიციური პარტიების უმრავლესობასთან სხვადასხვა ტიპის კომუნიკაცია შედგა. კერძოდ, კობახიძის განცხადებით, მმართველი გუნდის წარმომადგენლების მხრიდან მინიმუმ 5 პარტიასთან შედგა საუბარი და ის არაპირდაპირ თუ პირდაპირ თავადაც იყო საუბრებში ჩართული.

„ჩვენი ვარაუდია, რომ უკვე თებერვალ-მარტში პარლამენტი არ იქნება არც ერთპარტიული, არც ორპარტიული, არც სამპარტიული. იქნება სამზე მეტი. ჯერ დაკონკრეტება მართლა რთულია, მაგრამ პროცესი აუცილებლად დაიწყება და ეს მოხდება წლის დასაწყისიდან. თებერვალში იწყება სესია და დასაწყისშივე ვფიქრობთ, გამოიკვეთება სიახლეები. შეიძლება ყველა წამოვიდეს.

შემიძლია გითხრათ, რომ პარტიების უმრავლესობასთან სხვადასხვა ტიპის კომუნიკაცია შედგა. საერთაშორისო პარტნიორების მოწოდებაც ეს იყო, რომ მათ გარეშეც გვქონოდა კომუნიკაცია და ეს კომუნიკაცია შედგა ამ პარტიების უმრავლესობასთან, უმრავლესობა არის მინიმუმ ხუთი რვიდან. მე დეტალებში არ შევალ, მაგრამ ჩვენი გუნდის სხვადასხვა წევრი, 3-4-ზე მეტი წევრი იყო ჩართული ასეთი ტიპის კომუნიკაციაში მინიმუმ 5 პარტიასთან. ბუნებრივია, მეც პირდაპირ თუ არაპირდაპირ ჩართული ვიყავი მთლიანად ამ პროცესში, მათ შორის კომუნიკაციის ამ ნაწილში. ეს შემიძლია დაგიდასტუროთ და ეს არ ეხებოდა 2 და 3 პარტიას, მეტთან მქონდა პირდაპირი თუ არაპირდაპირი ჩართულობა", - განაცხადა ირაკლი კობახიძემ.

მისივე თქმით, რამდენიმე სუბიექტისთვის მოლაპარაკების ჩაშლა თვითმიზანია.

„მათ შორის ეს გამოიკვეთა მეოთხე რაუნდის შემდეგ. თქვენ იცით, რომ პირველი სხდომის წინა დღეს იგეგმებოდა მეხუთე რაუნდი, მაგრამ მაშინ კონკრეტულმა, ერთმა-ორმა ოპოზიციურმა ძალამ ყველაფერი გააკეთა, რათა ეს მეხუთე რაუნდი სხდომის წინა დღეს არ შემდგარიყო. ჩვენი სურვილი იყო, სხდომამდე გაკეთებულიყო ეს ყველაფერი, რათა პირველი სხდომა ჩატარებულიყო უკვე არა ერთპარტიულ რეჟიმში, მაგრამ ყველაფერი გააკეთეს, რომ იმ დღეს მეხუთე რაუნდი არ შემდგარიყო. აქ პირდაპირ შეგვიძლია დავასახელოთ ორი სუბიექტი, ეს არის „ევროპული საქართველო“, როგორც პარტია, რომელსაც შესვლის არავითარი ინტერესი არ აქვს. როგორ უნდა ელაპარაკო ვიღაცას რაღაცაზე, ვინც ვერც კი შედის. თეორიულად რომ დავუშვათ, ჩვენ და „ევროპული საქართველო“ რაღაცაზე შევთანხმდით, ამის პირობა ხომ არის, რომ უნდა შევიდნენ, ვერ შედიან, რაზე უნდა შეუთანხმდე, იგივეა, რომ ვიღაცა ბარიერვერგადალახულ პარტიას ელაპარაკებოდე შესვლაზე. იგივეა „ევროპული საქართველოს“ შემთხვევაში, ვერ შედის პარლამენტში და რაზე უნდა მოელაპარაკო“, - განაცხადა კობახიძემ.

მისივე თქმით, ჰქონდათ ვარაუდი, რომ ელენე ხოშტარია „ევროპულ საქართველოს“ დატოვებდა.

„წინასწარ ვამბობდით, რომ ხოშტარია გავიდოდა და გავიდა, გაჰყვება სავარაუდოდ შავგულიძე. ნაკაიძე და ახვლედიანი არ არიან მათი წევრები და რჩება ერთადერთი ბაქრაძე, და ბაქრაძეც არ არის მათი ლიდერი, ყველამ ვიცით, რომ ბოკერია წყვეტს ყველაფერს. ხოშტარია და შავგულიძე იყვნენ ყოველთვის ერთად და ერთად აპირებდნენ „ევროპული საქართველოს“ დატოვებას“, – განაცხადა კობახიძემ.