ირმა ინაშვილის თქმით, „პატრიოტთა ალიანსი“ მოლაპარაკებების მეხუთე რაუნდში მონაწილეობას მიიღებს

მეხუთე რაუნდს ელოდება მთელი პოლიტიკური სპექტრი. ჩვენი პარტია მონაწილეობდა ყველა რაუნდში და ცხადია, ჩვენ მივიღებთ მონაწილეობას მეხუთე რაუნდში, - ამის შესახებ „პატრიოტთა ალიანსის“ ლიდერმა, ირმა ინაშვილმა განაცხადა. მისი თქმით, რამდენიმე დეპუტატის საკანონმდებლო ორგანოში შესვლა ვითარებას არ ცვლის და ინაშვილი კვლავ ახალი არჩევნების დანიშნვის მომხრედ რჩება.

„მე ვისურვებდი, რომ შედგეს შეთანხმება არა მარტო საარჩევნო კანონმდებლობის დაკავშირებით, არამედ იმასთან დაკავშირებით, რომ დაინიშნოს ქვეყანაში ახალი არჩევნები. ჩვენ ეს მოთხოვნა გვქონდა დასაწყისშივე და დღესაც ეს მოთხოვნა გვაქვს.

მინდა გითხრათ ისიც, რომ ხელისუფლებებს ახასიათებთ ხოლმე სიხისტე. ზოგიერთ ხელისუფლებას ახასიათებს სიჯიუტე, ზოგიერთს უგუნურება. ამ ვითარებაში, როცა ქვეყანაში არის პოლიტიკური კრიზისი, მინდა, „ქართული ოცნება“ დავარწმუნო იმაში, რომ პარლამენტში რამდენიმე დეპუტატის შესვლით არ იცვლება პოლიტიკური რეალობა და ეს პარლამენტი ვერ ხდება მრავალპარტიული“, - განაცხადა ინაშვილმა.

საქართველოს პარლამენტმა „პატრიოტთა ალიანსის“ სამი წევრის, ირმა ინაშვილის, გიორგი ლომიასა და გოჩა თევდორაძის ადგილმონაცვლეებისთვის დეპუტატის უფლებამოსილების საკითხს კენჭი უყარა. რიგგარეშე სხდომაზე პარლამენტმა სამივე დეპუტატის ადგილმონაცვლე დაამტკიცა. ირმა ინაშვილის - ადგილმონაცვლეა გელა მიქაძე; გიორგი ლომიას ადგილმონაცვლეა - ფრიდონ ინჯია; გოჩა თევდორაძის - ადგილმონაცველა დავით ზილფიმიანი.

გელა მიქაძემ, დავით ზილფიმიანმა, ფრიდონ ინჯიამ და „პატრიოტთა ალიანსის“ სიით პარლამენტში შესულმა კიდევ ერთმა დეპუტატმა, ავთანდილ ენუქიძემ ახალი პარტიის, „ევროპელი სოციალისტების“ შექმნა დააანონსეს.