ვახტანგ მეგრელიშვილის განცხადებით, „სტრატეგია აღმაშენებლის“ ლიდერებთან შეხვედრას გეგმავს

„გირჩის“ ერთ-ერთი ლიდერის განცხადებით, „სტრატეგია აღმაშენებლის“ ლიდერებთან შეხვედრას გეგმავს.

ვახტანგ მეგრელიშვილის თქმით, ის 90%-ით დარწმუნებულია, რომ „სტრატეგია აღმაშენებელი“ „გირჩის“ წინადადებას მიიღებს.

„არ ვიცი როდის, მაგრამ გიორგის ვხვდებით ნამდვილად და ალბათ თაკო ჩარკვიანსაც იმიტომ, რომ ეთერებში ვხვდებით ერთმანეთს და პოზიციები აშკარად არის შესაჯერებელი.

სინამდვილეში, გიორგიმ იცის რაზეც უნდა ველაპარაკოთ, დარწმუნებული ვარ, რომ ის მედია საშუალებებსაც ადევნებდა თვალს და ვფიქრობ, გიორგი მომზადებული იქნება ამ საუბრისთვის“, - განაცხადა ვახტან მეგრელიშვილმა.

მისი თქმით, ისეთი გამოსავალი უნდა მოიძებნოს, რომელიც მისაღები იქნება არამარტო ორი ან სამი პარტიისთვის, არამედ მთლიანად პოლიტიკური სპექტრისთვის ქვეყანაში.

„ანუ ჩვენ ისეთი გადაწყვეტილება უნდა შევთავაზოთ საზოგადოებას, რომელზეც კონსესუსი იქნება, ჩვენ არ გვაქვს ესეთი საუბარი, რომ მოდი, ვიღაც შევიდეს და მიზანი ჩვენი ურთიერთობის ჩვენს კოლეგებთან თუ „ქართული ოცნებასთან“ არ არის ის, რომ ვინმე შევიდეს პარლამეტში, საუბარია იმაზე, რომ ჩვენს შორის შესაძლებელი გახდეს საუბარი და ამ საუბრის შედეგად მივიდეთ ხოლმე შეთანხმებამდე, რისი პრაქტიკაც აქამდე არ გვქონია, მაგრამ ჩემი აზრით, თუ როდისმე გვქონია ამის საჭიროება ეს არის დღეს და ამას ვცდილობთ ალეკოსთან ერთად და ეს მოვილაპარაკეთ - ის კი არა, რომ ვთქვათ ალეკოს რაღაც აკმაყოფილებს და ის ამის გამო პარლამენტში შევა ან „გირჩს“ რაღაც უნდა.

ჩვენ რაც გვინდა იმისთვის, გასაგებია, რომ ტექნიკურად საჭიროა, რომ ყველა შემოვიდეს პარლამენტში, მაგრამ ნებისმიერ შემთხვევაში ის, რომ პარლამენტი იყოს და იმისთვის, რომ იქ არც „ქართულ ოცნებას“ ჰქონდეს მორალური პრობლემა, რომ ვიღაცამ აჯობა და არც ოპოზიციას ჰქონდეს პრობლემა, რომ ვიღაცამ შეათრია ან მოისყიდა - საჭირო არის საზოგადოებისთვის გასაგები შეთანხმების მიღება და ისე რაღაც ახალი პროცესის დაწყება. თუ ეს შევძელით, ყველანი ვიქნებით ბედნიერები, თუ ეს ვერ შევძელით გამოჩნდება, რატომ ვერ შევძელით და ნებისმიერ შემთხვევაში საზოგადოებისთვის გასაგები გახდება პოლიტიკურ ველზე პარტიების მიზნები და ამოცანები”,- აღნიშნა ვახტანგ მეგრელიშვილმა.

ხელისუფლებასა და ოპოზიციას შორის მოლაპარაკების მეხუთე რაუნდის მოლოდინის პარალელურად, არჩევნებში ბარიერგადალახული ოპოზიციური პარტიები ერთმანეთთან კონსულტაციებს მართავენ. ასეთი შეხვედრა „მოქალაქეებსა“ და „გირჩს“ შორის შედგა.

„გირჩის“ ინიციატივაა, რომ რეალურ საარჩევნო რეფორმაზე შეთანხმების შემთხვევაში, თვითმმართველობის არჩევნებს პლებისციტის ფუნქცია მიენიჭოს. შესაბამისად, თუ ჯამურად ოპოზიცია გაიმარჯვებს, 2022 წელს ახალი საპარლამენტო არჩევნები უნდა დაინიშნოს. წაგების შემთხვევაში, კი აღიარონ, რომ გაყალბება სულაც არ ყოფილა იმ მასშტაბის, რის მტკიცებასაც თავად ცდილობენ. „გირჩი“ და „მოქალაქეები“ ამ მიზნით, ოპოზიციასთან შეხვედრებს იწყებენ. განსხვავებული შეხედულება აქვთ ოპოზიციის სხვა წარმომადგენლებს.