ლევან თარხნიშვილი: „ევროპულ საქართველოზე“ ორკესტრირებული შეტევაა და სამწუხაროა, რომ ამაში თავიანთი წვლილი ალეკო ელისაშვილსა და „გირჩსაც“ შეაქვთ

„ევროპულ საქართველოზე“ ორკესტრირებული შეტევაა და სამწუხაროა, რომ ამ შეტევაში თავიანთი წვლილი შეაქვთ ალეკო ელისაშვილსა და „გირჩს“, – ამის შესახებ „ევროპული საქართველოს“ წევრმა, ლევან თარხნიშვილმა ჟურნალისტებს განუცხადა.

თარხნიშვილის თქმით, „ევროპულმა საქართველომ“ ყველაფერი გააკეთა, რათა მოლაპარაკების პროცესი რაიმე შედეგამდე მისულიყო.

„ამ მოლაპარაკებების ყველა მონაწილე, გარდა ამ ადამიანებისა და „ქართული ოცნებისა“, დამეთანხმება, რომ „ევროპულმა საქართველომ“ ყველაფერი გააკეთა, რათა ეს პროცესი რაიმე შედეგამდე მისულიყო. ყველა რაუნდსა და ოპოზიციის შიდა მოლაპარაკებებში მაქსიმალურად ვცდილობდით, კონსტრუქციულები ვყოფილიყავით და გამოგვეყენებინა იდეები, რომლებიც რაღაცამდე მიგვიყვანდა.

რაც შეეხება იაგო ხვიჩიასა და ალეკო ელისაშვილის განცხადებებს, ეს მათ უნდა ვკითხოთ, საიდან მოიტანეს, ეტყობა სხვა მოლაპარაკებებზე დადიოდნენ. რას იზამენ ისინი სამომავლოდ, მე ნაკლებად მაინტერესებს. ის ადამიანი, რომელიც ფეხს შედგამს ერთპარტიულ პარლამენტში, წყვეტს არსებობას როგორც ოპოზიციონერი პოლიტიკოსი და ფაქტობრივად წევრიანდება "ქართულ ოცნებაში". თუ მათ ამის გაკეთება უნდათ, კი ბატონო“, – განაცხადა ლევან თარხნიშვილმა.

იაგო ხვიჩიამ განაცხადა, რომ „ლელოს“ და ვაშაძის პარტიას შეთანხმება უნდათ, „ევროპულ საქართველოს“ – არა. ის ასევე აცხადებს, რომ „გადაწყვიტეს, ჯერ ყველას ერთად დაველაპარაკოთ და მერე სათითაოდ შევხვდეთ იმ ხალხს, რომლებიც არ არიან დესტრუქტორები და ხელს არ გვიშლიან საუბრის დროს“.

ხელისუფლებასა და ოპოზიციას შორის მოლაპარაკების მეხუთე რაუნდის მოლოდინის პარალელურად, არჩევნებში ბარიერგადალახული ოპოზიციური პარტიები ერთმანეთთან კონსულტაციებს მართავენ. ასეთი შეხვედრა „მოქალაქეებსა“ და „გირჩს“ შორის შედგა.

ცნობილი გახდა, რომ „სტრატეგია აღმაშენებელი“ „გირჩსა“ და „მოქალაქეებთან“ ინდივიდუალურ შეხვედრაზე უარს ამბობს. როგორც „სტრატეგია აღმაშენებლის“ ლიდერმა, გიორგი ვაშაძემ „პალიტრანიუსის“ გადაცემა „ნიუსრუმში“ განაცხადა, ასეთი შეხვედრა არ შედგება, რადგან ერთი მხრივ იგი თვითიზოლაციაშია და მეორე მხრივ ფიქრობს, რომ ყველაფერი განხილული უნდა იყოს საერთო ფორმატში.

„მოქალაქეების“ ლიდერი, ალეკო ელისაშვილი არ გამორიცხავს, რომ გიორგი ვაშაძეს ყოფილი ხელისუფლების წარმომადგენლები, მათ შორის მერაბიშვილი და ბოკერია კომპრომატებით ემუქრებოდნენ.

„ევროპული საქართველოს“ წევრმა, აკაკი ბობოიხიძემ განაცხადა, რომ ალეკო ელისაშვილისა და „გირჩის“ ნაწილის მიმართ სიტყვა „ოპოზიცია“ აღარ გამოიყენოთ.