ხატია დეკანოიძე: აქამდე გაკეთებული განცხადებებიდან შინაარსი ვერ გამოვიტანე, რატომ არის ეს გირჩის განაყოფი ოპოზიციაზე გაბრაზებული?

ოპოზიციის ერთიანობა და პლატფორმა რჩება ყველაზე მძლავრ იარაღად საქართველოში, ჯერჯერობით. უმძიმესი კრიზისის პირობებში, მეტი სიფრთხილე უნდა გამოგვეჩინა ყველას ამ ოპოზიციური პლატფორმის შენარჩუნებაში, - ამის შესახებ „ნაციონალური მოძრაობის“ წევრმა, ხატია დეკანოიძემ „TV პირველის“ ეთერში განაცხადა.

„მე ვერ გამოვიტანე შინაარსი აქამდე გაკეთებული განცხადებებიდან. რატომ არის ეს გირჩის განაყოფი ოპოზიციაზე გაბრაზებული? რატომ დაიწყეს მოლაპარაკებების მეხუთე რაუნდის პირობებზე საუბარი, რომელზეც ოპოზიცია არ იყო შეთანხმებული? მიუხედავად იმისა, რომ სულ ვცდილობდი დრამატიზმი მომეკლო ამ შეფასებებში მათ შორის იმიტომ, რომ ჩვენთვის არის მნიშვნელოვანი ერთობის შენარჩუნება. გასაგებია, რომ ამ ადამიანებს ოპოზიციის დიდი ნაწილისგან აბსოლუტურად განსხვავებული პოზიცია აქვთ. ხისტი შეფასებებისა და ემოციების გარეშე რომ ვისაუბრო, უბრალოდ მიმაჩნია, რომ არასწორია. არასწორია პირველ რიგში იმიტომ, რომ აქამდე მეხუთე რაუნდი არ ყოფილა და ამიტომ „ქართული ოცნება“ კონკრეტული წინადადებებით არ მოსულა და ეს წინადადებები უდნა მოგვესმინა ჩვენ და გაგვეგო, აქვთ თუ არა სურვილი პოლიტიკური კრიზისი განმუხტონ. და მეორე, არასწორია მორალურადაც, პასუხისმგებლობას ვაკისრებთ ოპოზიციას, რომ პოლიტიკური კრიზისი არ განმუხტა და არ ვაკისრებთ ბოლომდე ხელისუფლებას, როდესაც ხელისუფლებამ მოიპარა არჩევნები“, - განაცხადა დეკანოიძემ.

იაგო ხვიჩიამ განაცხადა, რომ „ლელოს“ და ვაშაძის პარტიას შეთანხმება უნდათ, „ევროპულ საქართველოს“ – არა. ის ასევე აცხადებს, რომ „გადაწყვიტეს, ჯერ ყველას ერთად დაველაპარაკოთ და მერე სათითაოდ შევხვდეთ იმ ხალხს, რომლებიც არ არიან დესტრუქტორები და ხელს არ გვიშლიან საუბრის დროს“.

ხელისუფლებასა და ოპოზიციას შორის მოლაპარაკების მეხუთე რაუნდის მოლოდინის პარალელურად, არჩევნებში ბარიერგადალახული ოპოზიციური პარტიები ერთმანეთთან კონსულტაციებს მართავენ. ასეთი შეხვედრა „მოქალაქეებსა“ და „გირჩს“ შორის შედგა.