მაია მიმინოშვილი: ეროვნული გამოცდებში 39 ათასი აბიტურიენტი მონაწილეობს

ეროვნულ გამოცდებში 39 000-მდე აბიტურიენტი მონაწილეობს. ამის შესახებ ჟურნალისტებს შეფასებისა და გამოცდების ცენტრის ხელმძღვანელმა მაია მიმინოშვილმა განუცხადა, საგამოცდო პროცესი ზუსტად 09:00 საათზე დაიწყო. "დღეს დაიწყო საგამოცდო პროცესი. 41 500-ზე მეტი აბიტურიენტი იყო რეგისტრირებული ერთიანი ეროვნული გამოცდებისთვის, თუმცა გარკვეული რაოდენობა აბიტურიენტებისა გამოაკლდა პროცესს იმის გამო, რომ გამოსაშვებ გამოცდებზე ერთ-ერთ საგანში მაინც ვერ გადალახეს მინიმალური ბარიერი. აქედან გამომდინარე, დაახლოებით 39 000-მდე აბიტურიენტი მონაწილეობს პროცესში. მთელი საქართველოს მასშტაბით 22 საგამოცდო ცენტრი ფუნქციონირებს. წელს ერთი ახალი საგამოცდო ცენტრი დაემატა თბილისში. 08:00 საათზე დაიწყო რეგისტრაცია პირველი ნაკადისთვის და ზუსტად 09:00 საათზე დასრულდა", - განაცხადა მაია მიმინოშვილმა.

მიმინოშვილის თქმით, რამდენიმე აბიტურიენტი იყო, რომელსაც ნაკადი აერია. "თუმცა პირველი ნაკადია ეს, მეორეზე იყვნენ განაწილებულები და პრობლემა არ შეექმნებათ. ყოველ შემთხვევაში, ის, რისიც მეშინოდა, არ დაფიქსირებულა. კერძოდ არ ყოფილა შემთხვევა იმისა, რომ საგამოცდო ცენტრი არეოდა აბიტურიენტს თბილისსა ან ქუთაისში",- განაცხადა მიმინოშვილმა.

პირველ ნაკადში 9 ათასამდე აბიტურიენტი იღებს მონაწილეობას. "ქართულ ენასა და ლიტერატურაში იქნება ორი დღე გამოცდა, დღეს და ხვალ, შემდეგ ოთხშაბათს იქნება შესვენება. ხუთშაბათს და პარასკევს ვაგრძელებთ პროცესებს და აბიტურიენტები ჩააბარებენ ზოგად უნარებში გამოცდებს. გარკვეული პერიოდის შემდეგ გვეცოდინება რამდენმა აბიტურიენტმა დააგვიანა გამოცდაზე. წელს არ გვქონია შემთხვევა, რომ საგამოცდო ცენტრი არეოდა აბიტურიენტს", - განაცხადა მიმინოშვილმა.

მაია მიმინოშვილის განცხადებით, წელს 18 მსჯავრდებული აბიტურიენტია, მათგან ერთი გოგოა. 

საქართველოს მასშტაბით 22 საგამოცდო ცენტრი გაიხსნა.

ერთიანი ეროვნული გამოცდები დღეს დაიწყო და 27 ივლისს დასრულდება.