ვახტანგ მახარობლიშვილი: ევროკავშირს ოკუპირებულ ტერიტორიებზე მიმდინარე მოვლენების შესახებ დეტალური ინფორმაცია მივაწოდეთ

საქართველოს საგარეო საქმეთა მინისტრის მოადგილე, ვახტანგ მახარობლიშვილი სალომე ზურაბიშვილის ბრიუსელში ვიზიტის დეტალებზე საუბრობს. მისი თქმით, პრეზიდენტმა ევროსაბჭოს პრეზიდენტთან, შარლ მიშელთან და ევროკავშიერის უმაღლეს წარმომადგენელს ჟოზეპ ბორელთან არაერთი საკითხი განიხილა, თუმცა მთავარი აქცენტი პანდემიასთან დაკავშირებულ საკითხებზე გაკეთდა. მხარეებმა რეგიონში მიმდინარე მოვლენებიც განიხილეს და ქართულმა მხარემ ხაზი გაუსვა, რომ უაღრესად მნიშვნელოვანია ევროკავშირის მეტი ჩართულობა რეგიონში და საქართველოს, როგორც ევროკავშირის სანდო და მნიშვნელოვანი პარტნიორი, ბუნებრივია შეუძლია კიდევ უფრო მეტი როლი შეასრულოს აღნიშნულ პროცესებში.

„ევროპულმა მხარემ მზაობა გამოხატა, რომ ისინი ამ მიმართულებით მნიშვნელოვან ნაბიჯებს გადადგამენ ახლო მომავალში. რა თქმა უნდა, საუბარი შედგა ორმხრივ დღის წესრიგზე საქართველო - ევროკავშირის თანამშრომლობაზე და ინტეგრაციის პროცესზე. შევეხეთ ასოცირების შეთანხმების იმპლემენტაციას, აღმოსავლეთ პარტნიორობის თემატიკას. საქართველოს პრეზიდენტმა მიაწოდა ევროპულ მახარეს ინფორმაცია სტრასბურგში მიღებულ გადაწყვეტილებასთან დაკავშირებით, რომელიც მართლაც ისტორიული გადაწყვეტილებაა და გარკვეული მოლოდინი დაფიქსირდა ქართული მხრიდან, რომ ევროკავშირი აღნიშნულ საკითხს გაითვალისწინებს და შესაბამის რეაგირებასაც მოახდენს. პრეზიდენტ მიშელმა დააფიქსირა მზაობა, რომ აღნიშნულ საკითხზე ის ისაუბრებს თავის კოლეგებთან სამიტის ფარგლებში, რომელიც დღეს საღამოს იმართება და ზოგადად ევროკავშირმა კიდევ ერთხელ გაუსვა ხაზი საქართველოს ტერიტორიულ მთლიანობას და სუვერენიტეტს“, - გააცხადა ვახტანგ მახარობლიშვილმა.

მისივე თქმით, ხაზი გაესვა ევროკავშირის მონიტორინგის მისიის მნიშვნელობას საქართველოში და ჟენევის მოლაპარაკებებს, რომლის ფარგლებშიც ევროკავშირს არა მხოლოდ მედიატორის, არამედ გარკვეულწილად გარანტორის როლიც აქვს, რადგან სწორედ ის ორგანიზაციაა, რომელმაც განსაკუთრებული როლი შეასრულა 2008 წელს ცეცხლის შეწყვეტის შეთანხმების შეთანხმების მედიაციის პროცესში.

„ჩვენ მივაწოდეთ ევროკავშირს დეტალური ინფორმაცია ოკუპირებულ ტერიტორიებზე მიმდინარე მოვლენების შესახებ და გამოვთქვით იმედი, რომ საქართველოს თემატიკა და პრობლემატიკა აქტიურად იქნება განხილული როგორც ევროკავშირის შიგნით მაღალ დონეზე ასევე ევროკავშირის ორმხრივ დიალოგში რუსეთის ფედერაციასთან“, - განაცხადა მახარობლიშვილმა

საქართველოს პრეზიდენტის, სალომე ზურაბიშვილის ვიზიტი ბრიუსელში დღეს დაიწყო.