მამუკა მდინარაძე: მტკიცებულებათა მოპოვების ეტაპი დასრულდა, შესაბამისად, ივერი მელაშვილისა და ნატალია ილიჩოვას პატიმრობის საფუძველი არ არსებობს

ვალდებულნი ვართ, საზოგადოებას კიდევ ერთხელ განვუმარტოთ პროკურატურის პოზიცია იმასთან დაკავშირებით, როცა ისინი ამბობდნენ არგუმენტს, რომ შესაძლოა, ხელი შეუშალოს გამოძიებას და მტკიცებულებების მოგროვებას კონკრეტული ადამიანების გარეთ ყოფნამ, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ ჟურნალისტებს განუცხადა.

მისი განმარტებით, ამ ეტაპზე, არ არსებობს პატიმრობის საფუძველი, შესაბამისად ივერი მელაშვილი და ნატალია ილიჩოვა თავისუფლები არიან.

„ეს არგუმენტი გასაგებია, მაგრამ კიდევ უფრო მყარი პოზიციაა, როცა ისინი ამბობენ, რომ მტკიცებულებათა მოპოვების ეტაპის ამოწურვის შემდეგ ეს არგუმენტი აღარ არსებობს და ამიტომ მათვე ჩათვალეს, რომ მათი გირაოში ყოფნა გამოძიებას და სასამართლოს ხელს ვერ შეუშლის, სადაც საქმე გადავიდა. აბსოლუტურად გასაგები არგუმენტია, რომ მტკიცებულებათა მოპოვების ეტაპი დასრულდა, პატიმრობა პროკურატურის აზრით მანამდე იყო საჭირო და ეს გამოძიებას ააცილებდა საფრთხეებს, რომ მტკიცებულებების მოპოვების ხელშეშლა არ მომხდარიყო, დღეს ეს არგუმენტი არ არსებობს. შესაბამისად, არ არსებობს პატიმრობის საფუძველი და ეს ადამიანები არიან თავისუფლები“, - განაცხადა მდინარაძემ.

ივერი მელაშვილი და ნატალია ილიჩოვა 20-20 ათასი ლარის ოდენობის გირაოს სანაცვლოდ გათავისუფლდნენ.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.