ირმა ნადირაშვილი: დღეს დეპუტატებისთვის უფლებამოსილების არშეწყვეტა კიდევ ერთი მცდელობა იქნება „ქართული ოცნების“ მხრიდან, რომ გააგრძელოს ვაჭრობა ადამიანების პარლამენტში შეთრევაზე

„ევროპული საქართველოს“ წევრი, ირმა ნადირაშვილი, პარლამენტის მიერ ოპოზიციონერი დეპუტატებისათვის უფლებამოსილების შეყვეტის პროცესს ეხმაურება.

ნადირაშვილის თქმით, „ქართული ოცნება“ მთელი მისი მოქმედებებით არაპროგნოზირებადია, თუმცა თუ დღეს არ მოხდება ოპოზიციონერი დეპუტატების განცხადებების დაკმაყოფილება უფლებამოსილების შეწყვეტის თაობაზე, ეს იქნება კიდევ ერთი მცდელობა "ქართული ოცნების" მხრიდან, რომ გააგრძელოს ვაჭრობა ადამიანების პარლამენტში შეთრევაზე.

ნადირაშვილმა აღნიშნა, რომ იმ შემთხვევაშიც კი, თუ უფლებამოსილების შეწყვეტა არ მოხდება, ვითარება და ფაქტობრივი მდგომარეობა ვერ შეიცვლება, რომ საქართველოს აქვს ჩრდილოკორეის ერთპარტიული პარლამენტი.

„ჩვენი გეგმების თაობაზე არაერთხელ გვაქვს ნათქვამი და უფრო მეტიც, წერილობით განცხადებები შესულია უფლებამოსილების შეწყვეტის მოთხოვნით. რა მოლოდინები უნდა გვქონდეს, ამის თქმა არის ძალიან ძნელი, იმიტომ, რომ არაპროგნოზირებადია "ქართული ოცნება" მთელი თავისი მოქმედებებით, მაგრამ თუ დღეს არ მოხდება კანონის შესრულება და არ შეუწყვეტენ იმ ადამიანებს პარლამენტის წევრის უფლებამოსილებას, ვისაც არ უნდა, რომ პარლამენტის წევრი იყოს და გაყალბებული არჩევნების ლეგიტიმაცია მოახდინოს, ეს იქნება კიდევ ერთი მცდელობა "ქართული ოცნების" მხრიდან, რომ გააგრძელოს ვაჭრობა ადამიანების პარლამენტში შეთრევაზე.

თუმცა, იმ შემთხვევაშიც კი, თუ უფლებამოსილების შეწყვეტა არ მოხდება, რისი ნიშნებიც ჩვენ გვაქვს, ვითარება და ფაქტობრივი მდგომარეობა ვერ შეიცვლება, რომ ეს არის ჩრდილოკორეის ერთპარტიული პარლამენტი, როგორც ეს გუშინ თავის განცხადებაში თავისგან დამოუკიდებლად სალომე ზურაბიშვილმა აღნიშნა.“ - განაცხადა ნადირაშვილმა.

„ქართული ოცნება - დემოკრატიული საქართველოს“ ცენტრალურ ოფისში უმრავლესობის სხდომა მიმდინარეობს.

საქართველოს პრეზიდენტი სალომე ზურაბიშვილი პარლამენტს მოუწოდებს, ოპოზიციონერ დეპუტატებს უფლებამოსილება არ შეუწყვიტოს.

კარლ ჰარცელი კი აცხადებს: „კვლავაც მოვუწოდებ ყველა მხარეს, თავი შეიკავოს ამ პროცესში ნებისმიერი კარის ნაადრევად დახურვისაგან, განსაკუთრებით ისეთი კარის, რომელიც, თუკი დაიხურა, სამუდამოდ დახურული დარჩება“.

51 ოპოზიციონერი დეპუტატის საკითხი დღეს პლენარულ სხდომაზე განიხილება და კენჭი ეყრება.