გიორგი ვოლსკი: დღეს ყველაზე აგრესიულები ისინი არიან, რომელთა ლიდერებმა თავიანთი პოლიტიკით ხელი შეუწყეს იმ განუკითხაობის დამკვიდრებას, რაც ოკუპაციას მოსდევს

ხელისუფლება ყველაფერს გააკეთებს იმისათვის, რომ უკანონო პატიმრობიდან დაიხსნას თავისი მოქალაქე, - ასე გამოეხმაურა პარლამენტის პირველი ვიცე-სპიკერი გიორგი ვოლსკი ზაზა გახელაძისთვის პატიმრობის შეფარდებას.

ვიცე-სპიკერმა საოკუპაციო ხაზთან შექმნილ ვითარებასთან დაკავშირებით „ნაციონალური მოძრაობის“ ხელისუფლების როლზეც ისაუბრა და აღნიშნა, რომ სწორედ მათ, საერთაშორისო დონეზე აღიარეს საქართველოს ბრალეულობა.

„დააკვირდით, დღეს ყველაზე აგრესიულები ისინი არიან, რომელთა პოლიტიკურმა ლიდერებმამ , სწორედაც რომ ხელი შეუწყვეს თავისი პოლიტიკით იმ განუკითხაობის დამკვიდრებას, რაც ზოგადად ოკუპაციას მოსდევს. არამარტო ხელი შეუწყვეს, არამედ ოკუპაციასთან დაკავშირებით მათ საერთაშორისო დონეზე აღიარეს საქართველოს ბრალეულობა - ეს არის რეალობა. ამ რელობის გადასაფარად ის აქტივობები, რომელიც ხდება თუნდაც საგარეო საქმეთა სამინისტროს მიმდებარე ტერიტორიაზე ხელს უშლის იმას, რომ ჩვენმა მოწინააღმდეგე მხარემ ირწმუნოს, რომ ჩვენ რეალურად განვაგებთ ბერკეტებს, რათა მათ მოსვენება არ მივცეთ, სანამ ზაზა გახელეძეს უკანონო პატიმარს არ დაუბრუნებენ საკუთარ სახლს”,- განაცხადა გიორგი ვოლსკიმ.

მისი თქმით, არსებობს გარკვეული თემები, საკითხები, როდესაც ეროვნული შეგნება და დამოკიდებულება უნდა იყოს ერთიანი, მიუხედავად კატეგორიული მიუღებლობისა, რაც საქართველოს პოლიტიკურ ველზე პარტიებს გააჩნიათ.

„ყველას გვახსოვს, აშშ და ევროკავშირი არა მარტო მიგვითითებდა როგორ უნდა აგვეცილებინა აგრესია, არამედ მნიშვნელოვანი პოლიტიკური და ფინანსური რესურსებით იყვნენ ჩართული პროცესებში. მიუხედავად ამისა, ნაციონალური მოძრაობის ხელისუფლებამ პოლიტიკა ისე წარმართა, რომ რუსეთს აგრესიის და ოკუპაციის საშუალება მისცა. რაც ახლა ხდება ოკუპირებულ ტერიტორიებზე, ეს არის გამოძახილი, რომელიც ყოველ დღე გვახსენებს თავს იმ მძიმე, მოღალატეობრივი მოქმედებების გამო, რომელიც წინა ხელისუფლებამ ჩაიდინა“, - განაცხადა გიორგი ვოლსკიმ.

ოკუპირებული ცხინვალის ე.წ-მა სასამართლომ, ზაზა გახელაძეს 12 წლითა და 6 თვით უკანონო პატიმრობა მიუსაჯა. მას ბრალდება რუსეთის ფედერაციის სისხლის სამართლის კოდექსის ორი მუხლით ედავებოდა: 317-ე მუხლით, რომელიც სამხედრო მოსამსახურის სიცოცხლის ხელყოფის მცდელობად კვალიფიცირდება და 322-ე მუხლით, რაც „სახელმწიფო საზღვრის უკანონოდ გადაკვეთას“ გულისხმობს.

ოკუპანტებმა ზაზა გახელაძე 11 ივლისს დაჭრეს და დააკავეს.

საქართველოს ხელისუფლებამ, ჟენევაში გამართული საერთაშორისო მოლაპარაკებების 51-ე რაუნდის დროს, ზაზა გახელაძის დაუყოვნებლივ გათავისუფლება მოითხოვა.