"გირჩის" ქუთაისის ოფისის ხელმძღვანელი ქუთაისის მერიას სასამართლოში უჩივის

„გირჩის“ ქუთაისის ოფისის ხელმძღვანელს თემურ ცამციშვილს ქუთაისის სააპელაციო სასამართლოში, სარჩელი შეაქვს. იგი ასაჩივრებს პირველი ინსტანციის სასამართლოს გადაწყვეტილებას, რომელმაც  მას ქუთაისის მერიის სასარგებლოდ 6,000 ლარის გადახდა დააკისრა. საქმეზე გამოძიება 2010 წელს დაიწყო, მაშინ როდესაც თემურ ცამციშვილი ქუთაისის მერიაში მუშაობდა. პროკურატურა მას თბილისიდან ქუთაისამდე მანძილის გაყალბებას და ნაცვლად 230 კილომეტრისა, გათვლებში 250 კილომეტრის გამოყენებას ედავებოდა. ცამციშვილმა 2012 წელს დაკისრებული ჯარიმა აღსრულების ბიუროს გადაუხადა, თუმცა ორი თვის წინ იგივე საქმეზე ქუთაისის მერიამ მას ხელახლა მოსთხოვა ზიანის ანაზღაურება. „გირჩი“ მოუწოდებს ქუთაისი სააპელაციო სასამართლოს. სასამართლო გადაწყვეტილება  გააუქმოს. „ჩვენ ვზრუნავთ არა მხოლოდ თემურ ცამციშვილის ფინანსურ მდგომარეობაზე, არამედ საქართველოს საერთო სასამართლოების პრესტიჟზეც, რომელსაც ისე არაფერი არ ანადგურებს, როგორც საკუთარი ბრიყვული გადაწყვეტილებებისგან განცდილი უხერხულობა და მოვუწოდებთ ქუთაისის სააპელაციო სასამართლოს, გააუქმოს თანაქალაქელი სასამართლოს პირველი ინსტანციის გადაწყვეტილება,“- განაცხადა პარტიის ლიდერმა ზურაბ ჯაფარიძემ.

იგივე თანხას მერიას ასევე უხდის ერთ-ერთი კერძო კომპანია, რომელიც ახორციელებდა 2010-2011 წელში მერიის დაკვეთით ადამიანების გადაყვანას.