გიორგი შარაბიძე თამარ ჟვანიას ვადამდელ გათავისუფლებაზე: შეიძლება, ბევრი ისეთი რჩევა გაიგოთ, რაც შეუსრულებელია

ცესკოს თავმჯდომარეს აქვს ვადა და ამ ვადის ფარგლებში მხოლოდ კანონით გათვალისწინებულ შემთხვევებში შეიძლება მისი უფლებამოსილების ვადამდე შეწყვეტა. აქედან გამომდინარე, ეს საკითხი სამუშაო ჯგუფის შეხვედრაზე არ დასმულა, - ამის შესახებ ცესკოს თავმჯდომარის მოადგილემ, გიორგი შარაბიძემ ჟურნალისტებს განუცხადა.

მას კითხვით მიმართეს, საარჩევნო რეფორმის ცვლილებებიდან გამომდინარე, შესაძლოა თუ არა თანამდებობა ცესკოს თავმჯდომარემ, თამარ ჟვანიამ დატოვოს.

შარაბიძის თქმით, საარჩევნო რეფორმასთან დაკავშირებული სამუშაო ჯგუფის შეხვედრაზე ასევე არ განხილულა საკითხი კომისიის რომელიმე წევრის უფლებამოსილების შეწყვეტის შესახებ.

„საკითხები იმასთან დაკავშირებით, ვინმეს ვადა შეუწყდება თუ არა, არ განხილულა. ყველა მოქმედ წევრს კანონით გათვალისწინებული ვადა აქვს. არჩევნებთან დაკავშირებით ბევრი ისეთი რამე ისმის, რაც რეალობას არ შეესაბამება. შეიძლება, ბევრი ისეთი რჩევა გაიგოთ, რაც შეუსრულებელია. ამიტომ, როცა ამ საკითხებზე მშვიდ ვითარებაში მსჯელობაა, სწორი გადაწყვეტილებები მიიღება.

ცესკო მზად არის, ნებისმიერ საკითხზე თანამშრომლობისთვის და ჩვენ დავპირდით, რომ ცესკოს ელექტრონული ხმის დამთვლელი მანქანების საშუალებით პილოტირება გაკეთებული აქვს 2018-2019 წლებში ადგილობრივი თვითმმართველობის არჩევნებისას და ყველა შედეგს, იქნება საკანონმდებლო ბაზა, თუ ტექნიკური საშუალება, ადმინისტრაცია სამუშაო ჯგუფს გაუზიარებს. არსებობს გამოცდილება, თუ რამდენად უსაფრთხოა ასეთი საარჩევნო ტექნოლოგიური სისტემები. არჩევნების წინ ამერიკულ მხარესთან კიბერუსაფრთხოების საკითხზე ვითანამშრომლებთ.

ცესკო ყველა მოსაზრებას წარადგენს, რაც ტექნიკურ საკითხებს, არჩევნებისთვის აღსრულებას ეხება. რაც შეეხება პოლიტიკურ საკითხს, ცესკოს დაკომპლექტების წესს, ამაზე არ გვექნება ოფიციალური პოზიცია. შეგვიძლია, ექსპერტიზის საშუალებით დავეხმაროთ - როგორია მოწყობა ადმინისტრაციის ან ხმის მიცემის პროცედურები“, - განაცხადა ცესკოს თავმჯდომარის მოადგილემ.

„მოქალაქეების“ ლიდერმა ალეკო ელისაშვილმა განაცხადა, რომ საარჩევნო ცვლილებებზე კანონპროექტის ისე მიღების შემთხვევაში, როგორც „ქართულ ოცნებასთან“ გაფორმებულ მათ მემორანდუმშია, „ავტომატურად ნიშნავს, რომ თამარ ჟვანია ცესკოს თავმჯდომარე აღარ იქნება“.

საარჩევნო რეფორმასთან დაკავშირებული სამუშაო ჯგუფი პირველ შეხვედრას მართავს. ჯგუფი საარჩევნო რეფორმის მოსამზადებლად იმუშავებს.