ბექა ოდიშარია ჰუბერტ ქნირშს შეხვდა

პარლამენტის დიასპორისა და კავკასიის საკითხთა კომიტეტის თავმჯდომარე, ბექა ოდიშარია დღეს საქართველოში გერმანიის ელჩს ჰუბერტ ქნირშს შეხვდა. ამის შესახებ ინფორმაციას საქართველოს პარლამენტი ავრცელებს.

როგორც განცხადებაშია ნათქვამი, ბექა ოდიშარიამ შეხვედრაზე ხაზი გაუსვა გერმანიის ისტორიულ მნიშვნელობას ქართული სახელმწიფოს ჩამოყალიბების პროცესში პირველი რესპუბლიკის არებობის პერიოდში, როდესაც ჩვენს ქვეყანაში გერმანიის სამი წარმომადგენლობა არსებობდა. მისი თქმით, განსაკუთრებით მნიშვნელოვანია, რომ გერმანიის რესპუბლიკის ელჩი აგრძელებს საქართველოსთან საქმიანი და მეგობრული ურთიერთობის ასწლიან ტრადიციას.

„შეხვედრაზე განიხილეს ქართული დიასპორული ორგანიზაციების მდგომარეობა გერმანიაში. ჰუბერტ ქნირშმა ამ ორგანიზაციებთან ურთიერთობის ინტერესი გამოხატა, რათა მოხდეს საქართველოს მეტი პოპულარიზაცია და განაცხადა, რომ ამასთან დაკავშირებით მას კონკრეტული ხედვები აქვს.

„ჩვენ ასევე ვისაუბრეთ კავკასიასა და მთლიანად რეგიონში არსებულ გამოწვევებზე და შევთანხმდით სამომავლოდ მჭიდრო თანამშრომლობაზე, რამდენადაც გამოიკვეთა ერთნაირი ხედვები და პროექტები, რომელთა საშუალებითაც ჩვენ შეიძლება მეტი ევროპა შემოვიყვანოთ საქართველოში და ქართველ ხალხს კიდევ ერთხელ შევახსენოთ, რომ ვბრუნდებით ევროპაში, ჩვენს ისტორიულ არეალში. გერმანიის საელჩო მზადყოფნას გამოთქვამს, რომ ამ მიმართულებით კომიტეტთან ერთად გასწიოს შესაბამისი ძალისხმევა“, - განაცხადა დიასპორისა და კავკასიის საკითხთა კომიტეტის თავმჯდომარემ, ბექა ოდიშარიამ შეხვედრის დასრულების შემდეგ.

შეხვედრაში მონაწილეობდა საქართველოში გერმანიის ელჩის მოადგილე ტანია ჰუტი“, - ნათქვამია განცხადებაში.