დავით ბაქრაძე: გადამწყვეტი იქნება ნიკა მელიას პოზიცია, თუ როგორ ხედავს ის მომავალს, აქედან გამომდინარე მივიღებთ გადაწყვეტილებას

პირველ რიგში, გადამწყვეტი იქნება ნიკა მელიას პოზიცია, თუ როგორ ხედავს ის მომავალს და საკუთარი ბრძოლის გზას. მოვუსმენთ ნიკას და აქედან გამომდინარე მივიღებთ გადაწყვეტილებას, - ამის შესახებ „ევროპული საქართველოს“ ერთ-ერთმა ლიდერმა დავით ბაქრაძემ ჟურნალისტებს გაერთიანებული ოპოზიცის შეხვედრის შესახებ განუცხადა, რომელზეც მთავარი განსახილველი თემა ნიკა მელიას საქმე იქნება.

„პირველ რიგში, მინდა აღვნიშნო, რომ რაც ხდება ნიკა მელიასთან მიმართებაში, ეს არის ცალსახა უკანონობა და ყველაზე საშიში უკანონობა გახლავთ არა მაშინ, როცა ის ღიად არის ჩადენილი, ყველაზე საშიში უკანონობა არის მაშინ, როცა შეფუთულია კანონში, ინსტიტუტებსა და სიმართლეში; საშიშია მაშინ, როცა ინსტიტუტები, კანონი და სამართალი ემსახურება უკანონობასა და პოლიტიკურ ინტერესს. ეს ხდება დღეს ნიკა მელიას თავს, რასაც აკეთებს ნიკა მელია, ეს არის საზოგადოებრივი განგაშის ატეხვა, სად არის დღეს საქართველო და რა მდგომარეობამდეა ქვეყანაში სამართლის, კანონისა და ინსტიტუტების მდგომარეობა. ამიტომ, ნიკა მელიას მხარდაჭერა ეს არ არის პარტიული და პოლიტიკური თემა.

დღეს ნიკა მელიას მხარდაჭერა ნიშნავს იმას, რომ ყველამ ერთად არ დავუშვათ, საქართველოში კანონის სახელით მოქმედებდეს უკანონობა. ამაზე ვისმჯელებთ დღეს. პირველ რიგში, გადამწყვეტი იქნება ნიკა მელიას პოზიცია, თუ როგორ ხედავს ის მომავალს და საკუთარი ბრძოლის გზას. მოვუსმენთ ნიკას და აქედან გამომდინარე, მივიღებთ გადაწყვეტილებას.

დაველოდოთ შეხვედრას. ჩემი პოზიცია ყოველთვის იყო და იქნება - ბრძოლა თუ გვინდა იყოს წარმატებისა და შედეგების მომტანი, ის უნდა იყოს მშვიდობიანი. ისეთი პოლიტიკური მეთოდები საკმარისად გვაქვს, რომ უკანონობის ჩადენა არ დავუშვათ“, - განაცხადა ბაქაძემ.

„პოლიტიკურად მოტივირებული საქმის გირაოს გადახდას არ ვაპირებ“, - აცხადებს „ნაციონალური მოძრაობის“ თავმჯდომარე, ნიკა მელია. პროკურატურამ პარლამენტს მის დასაპატიმრებლად შუამდგომლობაზე თანხმობა სთხოვა.

აღნიშნულ საკითხზე პარლამენტი პლენარულ სხდომაზე, 16 თებერვალს იმსჯელებს. საპარლამენტო უმრავლესობა მზადაა, ნიკა მელიას დეპუტატის იმუნიტეტი მოუხსნას.