ვახტანგ მეგრელიშვილი ოპოზიციის შეკრებაზე: კითხვები დავსვით და პასუხი ვერ მივიღეთ - ბოიკოტი გამოგვიცხადეს „გირჩს“

შეხვედრა ძალიან მალე დავტოვეთ და მიზეზი იყო ის, რომ ჩვენ რაღაც კითხვები დავსვით და ამ კითხვებზე არათუ პასუხი ვერ მივიღეთ, გავიდნენ გარეთ და სიგარეტის მოწევა დაიწყეს ნაცვლად იმისა, რომ კითხვებზე ეპასუხათ, - ამის შესახებ ვახტანგ მეგრელიშვილმა ოპოზიციურ პარტიებზე საუბრისას განაცხადა, მას შემდეგ, რაც „გირჩის“ წევრებმა ოპოზიციის გაერთიანებული შეხვედრა ნაადრევად დატოვეს.

მისივე განცხადებით, თუ რომელიმე ძალას შეიძლება, ოპოზიცია დაერქვას, პირველ რიგში, ეს „გირჩია“.

„კითხვები დავსვით და პასუხი ვერ მივიღეთ. გვითხრეს, არ გიპასუხებთო. ვიკითხეთ, ყველა ასე ფიქრობდა? მხოლოდ ორმა ადამიანმა გააქნია თავი: ერთი იყო რესპუბლიკური პარტია. კახა კუკავასაც უნდოდა საუბარი, მაგრამ ვერ გაბედა. ჩვენ შევეცდებით, დავაკვირდეთ, როგორ განვითარდება მელიასთან დაკავშირებით საუბარი და თუ ისე განვითარდა, როგორც ვვარაუდობთ, ჩვენ მოგვიწევს ორივე მხარეს მაქსიმალურად გავემიჯნოთ, როგორც პოზიციას, ისე - ოპოზიციას. ჩემი ვარაუდია, რომ პასუხები არ ჰქონდათ, მაგრამ, რას გაიგებ, შეიძლება, ჰქონდათ და არ გვითხრეს. ბოიკოტი გამოგვიცხადა „გირჩს“, სრულიად ოპოზიციურმა გაერთიანებამ. იმიტომ ფიქრობენ ჩვენზე, რომ „ქართული ოცნების“ თამაშს ვთამაშობთ, რომ სიტყვასიტყვით არ ვიმეორებთ წინასწარ შეთანხმებულ „მესიჯბოქესებს“. როგორც კი აზრს დაატან და განსხვავებული ფორმით იტყვი რამეს, შენ მიმართ ეჭვი ჩნდება. ეს რა უცნაური სამყაროა, კაცო. მელიას დაჭერა გვინდოდა და იმიტომ მოვედით აქ - რა სიგიჟეა ეს? - მხოლოდ იმიტომ, რომ სხვა სიტყვები დავამატეთ, რომელშიც ჩვენი აზრით, მთელი ქვეყნის რისკია ჩადებული და არა უბრალოდ მელიას საკითხი, გულმხურვალე ემოციები და სადღეგრძელოები. ორი მხარე, „ნაციონალური მოძრაობა“ და „ქართული ოცნება“ ყველაფერს აკეთებენ, რომ მათი ჩხუბი ამ ქვეყანაში იყოს მთავარი ამბავი. აგერ, თავმჯდომარეა გამზადებული, ახალგაზრდა პუტკუცუნი ბიჭი, რომელსაც თუ დაიჭერენ, ყველას შეგვეცოდება და საერთოდ ვეღარაფერს გავაკეთებთ, ვეღარავის დაველაპარაკებით“, - აცხადებს ვახტანგ მეგრელიშვილი.

ოპოზიციური პარტიების წარმომადგენლები „ლეიბორისტული პარტიის“ ოფისში შეიკრიბნენ. პოლიტიკოსები „ნაციონალური მოძრობის“ თავმჯდომარის, ნიკა მელიას დაპატიმრების შემთხვევაში მოქმედების გეგმაზე მსჯელობენ.