დავით სერგეენკო: პოლიტიკური დაძაბულობის მომხრეები ნებისმიერ შემთხვევაში შეინარჩუნებენ თავის დღის წესრიგს და ჩვენ გადავწყვიტეთ, მოვიქცეთ კანონის შესაბამისად

პოლიტიკური დაძაბულობის მომხრეები ნებისმიერ შემთხვევაში შეინარჩუნებენ თავის დღის წესრიგს და ჩვენ გადავწყვიტეთ, მოვიქცეთ კანონის შესაბამისად, - ამის შესახებ პარლემენტის ვიცე-სპიკერმა, დავით სერგეენკომ ნიკა მელიასთვის სადეპუტატო იმუნიტეტის შეჩერების საკითხთან დაკავშირებით განაცხადა.

მისი თქმით, კანონი უნდა იყოს დაცული ნებისმიერ შემთხვევაში.

„საბოლოოდ, ჩამოვყალიბდით პოზიციაზე, რომ მელიას იმუნიტს შევუჩერებთ. აქამდე რამდენიმე ფაქტორმა მიგვიყვანა. პირველი ის, რომ კანონი უნდა იყოს დაცული ნებისმიერ შემთხვევაში, თუნდაც ადამიანი თვლიდეს, რომ კონკრეტულად მისდამი უსამართლო გადაწყვეტილება იქნა მიღებული. კანონი უზენაესია და უნდა აღსრულდეს. მეორე მხრივ, სპეციალურად დავინტერესდი, რამდენი ადამიანი ატარებს დღეს საქართველოში იგივე სამაჯურს სხვადასხვა მიზეზის გამო და ასეთი აღმოჩნდა 400-მდე ადამიანი. ძალიან რთული იქნება მათთვის ახსნა, რატომ მოვიქეცით ერთ შემთხვევაში პოლიტიკოსთან მიმართებაში სხვანაირად და არაპოლიტიკოსთან მიმართებაში სხვანაირად. მე მაინც იმედს ვიტოვებ, რომ ნიკა მელიას გადაწყვეტილება იქნება კანონმორჩილი და შესაბამის ნაბიჯებს გადადგამს“, – განაცხადა დავით სერგეენკომ.

დავით სერგეენკომ ასევე უპასუხა შეკითხვას, თუ რამდენად მიზანშეწონილად მიაჩნია ნიკა მელიასთვის სადეპუტატო იმუნიტეტის შეჩერება.

დეპუტატის თქმით, ამის შესახებ კეთდებოდა შეფასებები და ანალიზი.

„ერთი მხრივ, გვაქვს ვითარება, როდესაც ოპოზიციის გარკვეული ნაწილი ორიენტირებულია მხოლოდ დაძაბულობაზე, მხოლოდ პროტესტზე და საერთოდ არ არის ორიენტირებული იმაზე, რომ საქმიანმა დისკუსიამ პარლამენტში გადმოინაცვლოს. ნებისმიერ შემთხვევაში, პოლიტიკური დაძაბულობის მომხრეები ამ დღის წესრიგს შეინარჩუნებენ, რა გადაწყვეტილებაც უნდა მიეღო პარლამენტს, კი ან არა. ამიტომ გადავწყვიტეთ, რომ კანონის შესაბამისად მოვიქცეთ“, – განაცხადა დავით სერგეენკომ.

პარლამენტში ნიკა მელიასთვის სადეპუტატო იმუნიტეტის შეწყვეტის საკითხზე იმსჯელებენ.

„პოლიტიკურად მოტივირებული საქმის გირაოს გადახდას არ ვაპირებ“, - აცხადებს „ნაციონალური მოძრაობის“ თავმჯდომარე, ნიკა მელია. პროკურატურამ პარლამენტს მის დასაპატიმრებლად შუამდგომლობაზე თანხმობა სთხოვა.