გიორგი ვოლსკი: ნიკანორ მელიას ზვარაკად წარმოდგენის გეგმა დიდი ხანია დამუშავებულია „ნაცმოძრაობასა“ და იმ ადამიანებში, ვისაც საცივში თავჩაყოფილები ეძახეს

ვფიქრობ, რომ პოლიტიკურ ასპარეზზე ნიკანორ მელიას ზვარაკად წარმოდგენის გეგმა დიდი ხანია დამუშავებულია „ნაცმოძრაობასა“ და იმ ადამიანებში, ვისაც საცივში თავჩაყოფილები ეძახეს სულ ახლახანს, - ამის შესახებ პარლამენტის ვიცე-სპიკერმა, გიორგი ვოლსკიმ განაცხადა.

„იმის გამო, რომ ვერ მოხდა პროვოცირება მასობრივი დაპირისპირებისა სახელმწიფო სტრუქტურებთან, შესაძლოა აი ამ სვლამ გაუმართლოს, მაშინ, როცა სასამართლოც და პროკურატურაც ძალიან ლოიალურები იყვნენ მის მიმართ, როცა სამაჯური მოიხსნა და გადააგდო“, - აღნიშნავს ვოლსკი.

პარლამენტმა ნიკა მელიას სადეპუტატო იმუნიტეტი შეუჩერა.

„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.

სასამართლოს მიერ განსაზღვრული გირაოს გადახდის ვადის გასვლის შემდეგ მელიას მიეცა დამატებითი ვადა გირაოს უზრუნველსაყოფად, თუმცა ბრალდებულმა არც დამატებით მიცემულ ვადაში არ შეასრულა სასამართლოს განჩინებით დაკისრებული ვალდებულება და გირაოს თანხა არ გადაიხადა.

12 თებერვალს საქართველოს მთავარმა პროკურატურამ ნიკა მელიასთვის აღკვეთის ღონისძიების სახით შეფარდებული გირაოს უფრო მკაცრი ღონისძიებით - პატიმრობით შეცვლის შუამდგომლობით სასამართლოში წარსადგენად პარლამენტს მიმართა.