მამუკა მდინარაძე მელიას საქმეზე: ასეთი ადამიანები, რადიკალები და დესტრუქციის შემოქმედები იმ მდგომარეობაში გაყენებენ, რომ უნდა დაიცვა სახელმწიფოს მომავალი

საქართველოს პარტნიორი სტრატეგიული ქვეყნის, აშშ-ის მიდგომაა, თუნდაც კონგრესმენი, რომელიც კაპიტოლიუმს თავს ესხმის, შენობაში იჭრება, იწოდება შიდა ტერორისტად, ეს ხალხი - „ნაცმოძრაობა“ და მიხეილ სააკაშვილი, ცდილობს ეროვნულ გმირად შერაცხოს ზუსტად იგივე ქმედებაში ბრალდებული ადამიანი, - ამის შესახებ ფრაქცია „ქართული ოცნების“ თავმჯდომარემ მამუკა მდინარაძემ ნიკა მელიას სასამართლო გადაწყვეტილების კომენტირებისას განაცხადა.

„ძალიან გულწრფელად მინდა გითხრათ, რომ არცერთი ადამიანის დაპატიმრების ბრძანება თუ განკარგულება რომელიმე ნორმალური ადამიანისთვის გასახარი არ შეიძლება იყოს, თუ ეს ადამიანი რამიმე მკვლელობასა და ტერორიზმში არ არის ბრალდებული, მაგრამ როდესაც ასეთი ადამიანები, რადიკალები და დესტრუქციის შემოქმედები, სახელმწიფოს იმ მდგომარეობაში გაყენებენ, რომ უნდა დაიცვა სახელმწიფოს მომავალი, შენ უკანონობის მხარეს ხარ, რადგანაც არ დაგაბრალოს შემდეგ ოპოზიციურ ლიდერზე პოლიტიკური დევნა, ასე ვერ გააკეთებ. როდესაც ასეთ მდგომარეობაში განზრახ გაყენებს კონკრეტული ადამიანი, ნიკანორ მელია, წარსულში მის მიმართ კონკრეტული დანაშაულზე განაჩენია გამოტანილი. ეს განაჩენი კი მაშინ აისახა „ქართუ ბანკის“ საქმეზე. მაშინ მის მიმართ სასამართლო ლმობიერი იყო.

პროკურატურა შემდეგაც ლმობიერი იყო მელიას მიმართ და დღეს თავადაც აღიარებდა, რომ მან გირაოს პირობები დაარღვია. პროკურატურის მიმართ ერთადერთი სამართლებრივი არგუმენტი ის ჰქონდათ, როდესაც მელიამ დაარღვია პირველ, მეხუთე თუ მეშვიდე ჯერზე, რატომ არ დააკავეთო. დიახ, აქ შეიძლება მათ არგუმენტაციას დავეთანხმოთ“, - განაცხადა მდინარაძემ.

„ნაციონალური მოძრაობის“ თავმჯდომარეს, ნიკა მელიას თბილისის საქალაქო სასამართლომ აღკვეთის ღონისძიებად პატიმრობა შეუფარდა.