დავით ზალკალიანი: ჩვენს ძმებს და დებს ოკუპირებული ხაზის მეორე მხარეს, ვთავაზობთ იმ სიკეთეების გაზიარებას, რა სიკეთეც მოაქვს საქართველოს ევროკავშირში ინტეგრაციას

ჩვენ ჩვენს ძმებსა და დებს ოკუპირებული ხაზის მეორე მხარეს, ვთავაზობთ იმ სიკეთეების გაზიარებას, რა სიკეთეც მოაქვს საქართველოს ევროკავშირში ინტეგრაციას, - ამის შესახებ ევროპასთან ინტეგრაციის, დიასპორისა და კავკასიის საკითხთა და საგარეო ურთიერთობათა კომიტეტების ერთობლივ სხდომაზე საგარეო საქმეთა მინისტრობის კანდიდატმა, დავით ზალკალიანმა განაცხადა.

მისი თქმით, რუსეთის ფედერაცია დღეს ცდილობს საერთაშორისო თანამეგობრობა შეიყვანონ შეცდომაში, დააფუძნოს ახალი ნარატივი.

„რუსეთის ფედერაცია დღეს ცდილობს საერთაშორისო თანამეგობრობა შეიყვანონ შეცდომაში, დააფუძნოს ახალი ნარატივი, რომ თითქოს ეს არის საკითხი, რომელიც უნდა გადაწყდეს ჩვენსა და აფხაზებსა შორის, ჩვენსა და ცხინვალის რეგიონში მცხოვრებ ჩვენ თანამოქალაქეებს შორის. წარმოაჩენენ სიტუაციას ისე, თითქოს საქართველო წინააღმდეგია ჩართულობის პოლიტიკის, შერიგებისა და პირდაპირი დიალოგის. არამც და არამც, ეს არის ის მცდარი ნარატივი, რომელის წარმოჩენასაც ისინი ცდილობენ და ჩვენ უნდა დავუპირისპირდეთ სიმართლით. ჩვენ გვინდა პირდაპირი დიალოგი ჩვენს აფხაზ და ოს ძმებთან და თანამოქალაქეებთან. ჩვენ არ გვინდა არანაირი ბარიერი. არ გვინდა მავთულხლართები, უკანონო დაკავებები და არ გვსურს ადამიანის უფლებების უხეში უგულებელყოფა, მაგრამ ჩვენ ჩვენს ძმებსა და დებს ოკუპირებული ხაზის მეორე მხარეს, ვთავაზობთ იმ სიკეთეების გაზიარებას, რა სიკეთეც მოაქვს საქართველოს ევროკავშირში ინტეგრაციას. ჩვენ მათ ვთავაზობთ შესაძლებლობას გამოიყენონ თავისუფალი ვაჭრობა ევროკავშირთან საქართველოს გავლით, ჩვენ მათ ვთავაზობთ გამოიყენონ თავისუფალი გადაადგილება, თავისუფალი სავიზო მიმოსვლა, ჩვენ მათ ვთავაზობთ, მიიღონ განათლება ევროპისა და ამერიკის საუკეთესო უნივერსიტეტებსა და კოლეჯებში. ჩვენ გვსურს პირდაპირი დიალოგი, მაგრამ არა იმ ფუნდამენტური საკითხების ხარჯზე, რაც დაკავშირებულია 2008 წლის ცეცხლის შეწყვეტის ხელშეკრულებასთან. საქართველო თანმიმდევრულია საკუთარი ვალდებულებების შესრულებაში. ჩვენ ძალის არ გამოყენების ვალდებულება გვაქვს აღებული და თანმიმდევრულად ვასრულებთ ამ ვალდებულებას. ეს იურიდიულად სავალდებულოა, საერთაშორისო თანამეგობრობის წინაშე ვართ ვალდებული. ერთადერთი, რაც ამ პროცესს აკლია რუსეთის მხრიდან შემხვედრი ნაბიჯის გადადგმაა. გვესაუბრებიან უამრავ სამშვიდობო პლატფორმაზე, გაერთიანებაზე რაღაც რეგიონულ პლატფორმებში, მაგრამ წარმოუდგენელია საქართველომ ეს ნაბიჯი გადადგას, მაშინ, როდესაც საოკუპაციო მხარე, ის ძალა, რომელიც ეფექტურ კონტროლს ახორციელებს, არ ასრულებს ნაკისრ ვალდებულებებს და ცდილობს, ის ვალდებულებები, რომელიც მას აქვს ჟენევის ფორმატში, წარმოაჩინოს რომ ეს მისი საქმე არაა და დისტანცია აქედან. ეს არის ის მცდარი ნარატივი, რომელსაც ცდილობენ ჩვენ საერთაშორისო პარტნიორებთან წარმოაჩინონ , რასაც ჩვენ არ უნდა ავყვეთ“, - განაცხადა დავით ზალკალიანმა.

პარლამენტის ხუთმა კომიტეტმა ირაკლი ღარიბაშვილის მთავრობას ნდობა უკვე გამოუცხადა.