ლევან ნიკოლეიშვილი: დამისახელეთ ერთი ცივილიზებული ქვეყანა, სადაც კანონის აღსრულება არ ხდება

ეს არის გზა, რომლითაც უნდა იმოქმედოს ნებისმიერმა ღირსეულმა სახელმწიფომ და მისმა ხელისუფლებამ. თუკი სასამართლომ გამოიტანა განჩინება და მისი აღსრულება დაეკისრა შსს-ს, მათი უშუალო ვალდებულება გახლავთ, რომ კანონი აღასრულონ,- ამის შესახებ ანალიტიკოსი, ლევან ნიკოლეიშვილი „ქრონიკაში“ ნიკა მელიას დაკავების შემდეგ განაცხადა.

„გასაგებია იქ შეკრებილ ადამიანთა ჯგუფი, რატომ აღიქვამენ ამას ასე მტკივნეულად, ვინაიდან მათ ვერ განახორციელეს ის, რისი იმედიც ჰქონდათ, ვერ აიყოლიეს ხალხის მასები, რომ ეს აჟიოტაჟი უფრო გაძლიერებულიყო. უფრო მეტიც, საზოგადოებაში აბსოლუტურად სხვანაირი განწყობაა, რომ სახელმწიფომ გამოავლინა, რომ ის ნამდვილად სახელმწიფოა და მისმა პოლიციამ განახორციელა კანონის აღსრულება. თქვენ წარმოიდგინეთ, რომ ნებისმიერ ადამიანს, ვისაც მოესურვება, კანონს დაარღვევს, მაშინ ჩვენ სახელმწიფო არ ვიქნებით. დამისახელეთ ერთი ცივილიზებული ქვეყანა, სადაც კანონის აღსრულება არ ხდება“, - განაცხადა ლევან ნიკოლეიშვილმა.

მან ასევე აღნიშნა, რომ სახელმწიფომ ადეკვატურად უნდა იმოქმედოს, წინააღმდეგ შემთხვევაში გვექნება ქაოსი, დესტაბილიზაცია.

„ნაციონალური მოძრაობის“ თავმჯდომარე, ნიკა მელია დააკავეს.

ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.

2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.