ოპოზიციის საპროტესტო აქციის მონაწილეებმა პარლამენტთან გადაინაცვლეს

თბილისში კანცელარიასთან მიმდინარე საპროტესტო აქციის მონაწილეებმა პარლამენტისკენ გადაინაცვლეს. მათ საკანონმდებლო ორგანოსთან კარავები გაშალეს და უშუალოდ პარლამენტის წინ, რუსთაველის გამზირზე გზის სავალი ნაწილი გადაკეტეს. შეკრებილები დაკავებულ ნიკა მელიას სოლიდარობას უცხადებენ და აცხადებენ, რომ კონსტიტუციის ფარგლებში იმოქმედებენ.

ამასთან, ოპოზიციონერები შექმნილი ვითარების განმუხტვის შესაძლებლობებზე საუბრობენ.

„ნებისმიერი ძალის გამოყენება ამ ვითარებაში არის ძალიან საშიში. ბუნებრივია, მოვუწოდებ სამართალდამცავ ორგანოებს ძალიან ფრთხილად იყვნენ, თავი შეიკავონ, იმიტომ რომ ადამიანები ძალიან დაძაბულები არიან. გამოსავალი არის ერთი - მშვიდობიანი პროტესტით ვაიძულოთ „ქართული ოცნება“ მოლაპარაკებების მაგიდას დაუბრუნდეს და შევთანხმდეთ კრიზისის განმუხტვის თაობაზე“, - აცხადებს „ლელოს“ ლიდერი ბადრი ჯაფარიძე.

ანა დოლიძე კი გამოსავალს სააპელაციო სასამართლოს გადაწყვეტილებაში ხედავს.

პირადად მინდა მივმართო სააპელაციოს მოსამართლე გიორგი გოგინაშვილს - გამოიყენოს მის წინაშე მდგარი უდიდესი შესაძლებლობა არასაპატიმრო ღონისძიება შეუფარდოს ნიკა მელიას. ამით ფაქტობრივად მას, ერთ ადამიანს შეუძლია შეცვალოს საქართველოს ისტორია. და მივმართავ ხელისუფლებას, აი ეს ფანჯარა, რომელიც არის ხვალამდე, სააპელაციო სასამართლოსი გამოიყენოს იმისთვის რომ ქვეყანა დაუბრუნდეს ნორმალურ პოლიტიკურ ცხოვრებას“, - აცხადებს დოლიძე.

პოლიტიკური განცხადებები პარლამენტთან მას შემდეგ გაკეთდება, რაც ადგილზე შესაბამის ტექნიკას მოიტანენ. ოპოზიციის მორიგი საპროტესტო აქცია-მსვლელობა 26 თებერვალს გაიმართება.

„ნაციონალური მოძრაობის“ თავმჯდომარე, ნიკა მელია დააკავეს.

ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.

2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.