ირაკლი ქადაგიშვილი: რატომაა, რომ „ნაციონალური მოძრაობის“ „ატლანტიკური“ რიტორიკა, საბოლოო ჯამში, საქართველოს დაზიანებითა და რუსეთის ინტერესების დაკმაყოფილებით სრულდება?!

ასეთი პოლიტიკური გარეწრებისთვის ფსევდოპატრიოტიზმი ხანდახან ბოლო თავშესაფარია. რუსეთი თუ ვინმეს მოკავშირედ გამოდის დღეს, გამოდის ქვეყნის ჩამომქცეველთა მოკავშირედ, - ამის შესახებ საპარლამენტო უმრავლესობის წარმომადგენელმა ირაკლი ქადაგიშვილმა „იმედის ფაქტორში“ ოპოზიციაზე საუბრისას განაცხადა.

მან მსოფლიო მართლმადიდებელთა ფორუმის საქართველოში ჩატარების შესახებ ისაუბრა და შემდეგ განვითარებულ მოვლენები გაიხსენა.

„იმ სხდომათა დარბაზში, როდესაც ამ პარლამენტართა შეკრება იყო, როგორც დღის წესრიგით იყო გაწერილი, სხდომა უნდა წაეყვანა, ბერძენ თანათავმჯდომარეს, მაგრამ აბსოლუტურად მოულოდნელად, დაუგეგმავად, ავიდა იქ ავადსახსენებელი გავრილოვი, ჩამოჯდა სკამზე და უცბად სიტუაცია აფეთქდა. რა თქმა უნდა, ამან ახალგაზრდების დიდი და სამართლიანი პროტესტი გამოიწვია. გავრილოვი საქართველოდან გაძევებული იქნა, რამდენიმე საათში დატოვა საქართველო და ეს ცუდი ინციდენტი გახდა რევოლუციური, პარლამენტში შეჭრის მცდელობის სცენარის განმახორციელებელი. თითქოს და გავრილოვმა ეს სპეციალურად გააკეთა, რომ იქ ოპოზიციის წარმომადგენლები პლაკატებით რამდენიმე წუთში გამოსულიყვნენ და პარლამენტზე ეს შტურმი დაწყებულიყო“, - განაცხადა ქადაგიშვილმა.

მისივე თქმით, მაშინდელმა პარლამენტის თავმჯდომარემ, ირაკლი კობახიძემ გუნდთან ერთად მიიღო პოლიტიკური გადაწყვეტილება და გადადგა, მიუხედავად იმისა, რომ იგი ამ პროცესებში ჩართული არ იყო და საქართველოში არც იმყოფებოდა.

ქადაგიშვილის განცხადებით, ირაკლი კობახიძის გადადგომით ეს ინციდენტი უნდა ამოწურულიყო.

„რატომ არის, რომ „ნაციონალური მოძრაობის“ „ევროპული“ და „ატლანტიკური“ მოძრაობის რიტორიკა, საქართველოს დაზიანებითა და საბოლოო ჯამში, რუსეთის ინტერესების დაკმაყოფილებით სრულდება?!“, - განაცხადა ქადაგიშვილმა.

მისივე თქმით, შემდეგ განვითარებულმა მოვლენებმა საქართველო დააზიანა.