მამუკა ხაზარაძე: შარლ მიშელმა შეხვედრაზე დააანონსა, რომ აპირებდა პრემიერ-მინისტრისა და ოპოზიციის შეხვედრის დაორგანიზებას, როცა დაინახა ჩვენი მზაობა შემდეგ გააკეთა განცხადება

ჩვენთვის არ უთქვამს ბატონ შარლ მიშელს, რომ ოპოზიციასთან შეხვედრაზე ჰქონდა მოლაპარაკება პრემიერ-მინისტრთან. მან გვითხრა, რომ მზადაა ასეთი შეხვედრის ორგანიზება დააანონსოს და ამის შესახებ ეტყვის პრემიერს. როცა დაინახა ჩვენი მზაობა, ამის შესახებ მას უნდა განეცხადებინა და ამიტომ არაფერი ვთქვით ჩვენს ინტერვიუებში. სწორედ ბრიფინგზე განაცხადა, რომ დღეს საღამოს ჩაინიშნა შეხვედრა, - ეს განცხადება „ლელო-საქართველოსთვის“ ლიდერმა მამუკა ხაზარაძემ „ტვ.პირველის“ ეთერში განაცხადა.

„შარლ მიშელმა განაცხადა, რომ მისი ჩართულობით, იწყება მედიაციის პროცესი „ქართულ ოცნებასა“ და ოპოზიციას შორის. მნიშვნელოვანია, როცა ასეთი მაღალი რანგის ევროპელი პოლიტიკოსი და თანამდებობის პირი ერთვება მოალპარაკების პროცესში. აქვე მინდა ვთქვა, რომ კონკრეტული ვადაცაა მითითებული, ორი კვირა, იმიტომ რომ ეს პროცესი არ შეიძლება გაიწელოს, იმიტომ რომ ქვეყანა ვერ გაუძლებს ამას და ჩვენ ძალიან სწრაფად უნდა გამოვიდეთ ამ მდგომარეობიდან. იმედი მაქვს რომ ოპოზიციასა და ხელისუფლებას ეყოფა გონივრობა, რომ ეს პროცესი დაამთავროს მშვიდობიანად, ჩვენი ქვეყნისა და ხალხის საკეთილდღეოდ“, -აღნიშნა ხაზარაძემ.

ამასთან „ლელო-საქართველოსთვის“ ლიდერმა გამოთქვა მზაობა, პრემიერ-მინისტრისა და ოპოზიციის შეხვედრაში მონაწილეობისთვის. „ამაზე იყო საუბარი, როცა შარლ მიშელს შევხვდით და მზად ვართ ამაში სერიოზული როლი შევასრულოთ“, - აღნიშნა ხაზარაძემ.

პრემიერმა შარლ მიშელს დაუდასტურა, რომ დღეს ოპოზიციასთან შესახვედრად მზად არის.

შარლ მიშელმა დღეს საღამოს, მთავრობა და ოპოზიცია შეხვედრაზე დაპატიჟა.

მანამდე ევროპული საბჭოს პრეზიდენტი შარლ მიშელი ოპოზიციური პოლიტიკური პარტიების ლიდერებს შეხვდა.

საქართველოში ვიზიტით მყოფმა ევროპული საბჭოს პრეზიდენტმა, შარლ მიშელმა საქართველოს პრეზიდენტ სალომე ზურაბიშვილთან შეხვედრის შემდეგ განაცხადა, რომ ევროკავშირი მოუწოდებს ყველა მხარეს, ინტენსიურად იმუშაონ, რათა სიტუაცია განეიტრალდეს.