ლევან იოსელიანი: ამოცანა, რისთვისაც შემოვედით პარლამენტში შევასრულეთ, თან ძალიან კარგად

დღეს ისტორიული დღეა, იმიტომ რომ ჩვენ საბოლოო ჯამში შევძელით მიგვეღწია შეთანხმებისთვის და მიგვეღო დოკუმენტი, რომელიც სამომავლოდ საქართველოში არჩევნებს ცვლის, - ეს განცხადება პარლამენტში გამართულ ბრიფინგზე პარტია „მოქალაქეების“ ერთ-ერთმა ლიდერმა ლევან იოსელიანმა გააკეთა.

„ეს დოკუმენტი არჩევნებს გახდის უფრო გასაგებსა და სანდოს ჩვენი მოქალაქეებისთვის. ყველაზე მთავარი ისაა, რომ მეც და ალეკო ელისაშვილიც ვთვლით, რომ ჩვენი ამოცანა, რისთვისაც შემოვედით პარლამენტში შევასრულეთ, თან ძალიან კარგად. ეს ცვლილებები, როცა არ უნდა ჩატარდეს არჩევნები, თვითმმართველობის ან რიგგარეშე, თუ 2024 წლის არჩევნები, ეს საარჩევნო დღე იქნება ბევრად უფრო გამჭვირვალე და გასაგები, ვიდრე აქამდე იყო“, - აღნიშნა იოსელიანმა.

ამასთან, „მოქალაქეების“ ლიდერი აცხადებს, რომ საარჩევნო რეფორმა ითვალისწინებს ყველაზე მთავარს. „ელექტრონული გამომთვლელი მანქანების შემოტანას, რიგ საარჩევნო უბნებზე, შემდეგ მთელ საქართველოში. რეგისტრაციას ანაბეჭდის მეშვეობით, რაც გულისხმობს, რომ კარუსელების ყბადაღებული თემა სამუდამოდ დასრულდება. ასევე რაც ძალიან მნიშვნელოვანი, ხმების 10%-ის სავალდებულო გადათვლა. ესაა დაახლოებით 365 უბანი სავალდებულო წესით გადაითვლება, რაც პრინციპში უკვე გამორიცხავს იმის შესაძლებლობას, რომ ვინმემ რამის გაყალბებაზე იფიქროს. იმიტომ, რომ ასეთი მასშტაბის გადათვლა თავისთავად დააზღვევს ამ პროცესს. გადათვლა მოხდება მაქსიმუმ 6 დღის ვადაში არჩევნების ჩატარებიდან“, - აღნიშნა იოსელიანმა.

მისი თქმით, ეს და ყველა სხვა ცვლილებები რაც ამ კანონპროექტშია არის რევოლუციური. „ეს ახალ პოლიტიკურ ძალებსა და ლიდერებს მისცემს შესაძლებლობას, რომ მონაწილეობა მიიღონ პოლიტიკურ პროცესში. ამ ცვლილებების თანახმად თბილისში ბარიერი იქნება 2,5%, თვითმმართველ ქალაქებში ასევე 2,5%, სადაც მიმართება იქნება 1/4 პროპორციული სისტემის სასარგებლოდ. ხოლო დანარჩენ საქართველოში ბარიერი დაიწევს 3%-მდე“, - განაცხადა იოსელიანმა.

მისი თქმით, არჩევნები საქართველოში პოლიტიკური კრიზისის გამომწვევი არ უნდა იყოს. „ვიდრე კანონპროექტი კანონად იქცევა, გავითვალისწინებთ არასამთავრობო სექტორის რჩევებს და საბოლოო განხილვისთვის ვენეციის კომისიას გადაეგზავნება“, - აღნიშნა იოსელიანმა.