„სამართლიანი არჩევნები“ რვაპროცენტიან დისბალანსთან დაკავშირებით ოქმების წარდგენას საგამოძიებო კომისიაში გეგმავს

პარალელური დათვლის შედეგებში დაფიქსირებულ რვაპროცენტიანი დისბალანსი ტექნიკური შეცდომა იყო, - ამის შესახებ „სამართლიანი არჩევნებისა და დემოკრატიის საერთაშორისო საზოგადოების“ (ISFED) აღმასრულებელმა დირექტორმა, ნინო დოლიძემ განაცხადა.

„მივიჩნევ, რომ ეს ნამდვილად ტექნიკური შეცდომა იყო, თუმცა ორგანიზაციამ ძალიან მაღალი პასუხისმგებლობა გამოიჩინა, როცა მენეჯმენტი შეცვალა და ამიტომ ვარ მე აქ, რომ ეს გადაწყვიტა ორგანიზაციამ და მენეჯმენტი შეცვალა. რაც შეეხება შემაჯამებელ ოქმებს, ახლა ორგანიზაცია არის საბოლოო ანგარიშის წერის პერიოდში, რადგან ეს პერიოდი გაიწელა, ორგანიზაციას არ ჰყავდა დირექტორი, თუმცა გამგეობამაც გააკეთა განცხადება იმ რვაპროცენტიან დისბალანსთან დაკავშირებით. საბოლოო ანგარიშში ჩვენ წარმოვადგენთ უფრო დეტალურად“, – განაცხადა ნინო დოლიძემ.

კითხვაზე, დათანხმდება თუ არა მისი ორგანიზაცია მმართველი გუნდის მოთხოვნას რვაპროცენტიან დისბალანსთან დაკავშირებით ოქმების წარმოდგენის შესახებ, ნინო დოლიძემ უპასუხა, რომ თუ პარლამენტში საგამოძიებო კომისია შეიქმნება, ორგანიზაცია ოქმებს წარადგენს.

„მკითხეს, კომისია თუ შეიქმნება საგამოძიებო, ცხადია, ოქმებს წარმოვადგენთ, მაგრამ ანგარიშში ეს ოქმები არ იქნება. აქ იქნება ის ტენდენციები, რაზეც იყო საუბარი და საკმაოდ პრობლემური იყო გარკვეული ოქმები, რაზეც არ იყო საუბარი ადრე, ამაზეც ვისაუბრებთ“, – აღნიშნა ნინო დოლიძემ.

კითხვაზე – მარტივი ნათქვამი ხომ არ არის, რომ იყო ტექნიკური შეცდომა, რადგან „სამართლიანი არჩევნების“ მონაცემებს ეყრდნობოდა ოპოზიცია, როდესაც განაცხადეს, რომ არჩევნები გაყალბდა და სწორედ ამ პოზიციას მოჰყვა პროცესების პოლიტიკურ ჩიხში შეყვანა, ნინო დოლიძემ განაცხადა, რომ მისი მხრიდან არაკორექტული იქნება იმ პროცესებზე საუბარი, როდესაც ორგანიზაციაში არ მუშაობდა.

„იმ დროს სხვა ორგანიზაციას წარმოვადგენდი. მე, რაც ვნახე, ფორმულაში რეალურად დაშვებული იყო ტექნიკური შეცდომა და ეს არ იყო მიზანმიმართული, რაზეც შეიძლება, კითხვის ნიშნები ყოფილიყო. ვნახე ისიც, რომ ეს შედეგები მანდატებზე არ აისახებოდა, მიუხედავად იმისა, რომ შეიძლება, იყო სხვაობა. ამიტომ ვფიქრობ, რომ ეს შეცდომა უფრო მეტად იყო გამოყენებული პოლიტიკურად, ვიდრე რეალურად იყო, თუმცა, ჩემი მხრიდან არაკორექტული იქნება იმ პროცესებზე საუბარი, რომელშიც არ ვიყავი ჩართული. სწორედ იმიტომ ვარ ჩართული, რომ ორგანიზაციამ აქტიურად გააგრძელოს მონიტორინგი მაღალი ხარისხით და გამჭვირვალედ. უფრო მეტად იყო პედალირება, ვიდრე ეს იყო პრობლემა, რადგან „სამართლიანი არჩევნების“ ეს შეცდომა არ იყო ამ არჩევნების მთავარი პრობლემა“, – განაცხადა ნინო დოლიძემ.