ზვიად ზვიადაძე: იმედი მაქვს, ოკუპირებულ ტერიტორიაზე მცხოვრებ ადამიანებსაც ექნებათ იმ სამედიცინო სერვისებზე წვდომა, რომლებსაც ჩვენ ჩვენს მოქალაქეებს ვაწვდით

ერგნეთში, ინციდენტების პრევენვიისა და მათზე რეაგირების მექანიზმის ფარგლებში ჩანიშნული 98-ე შეხვედრის დაწყებამდე, შერიგებისა და სამოქალაქო თანასწორობის საკითხებში სახელმწიფო მინისტრის აპარატის წარმომადგენელმა, ზვიად ზვიადაძემ ჟურნალისტებს ის საკითხები გააცნო, რომლებსაც ქართული მხარე შეხვედრაზე დააყენებს.

„გარდა იმ საკითხებისა, რომელთა დაყენებასაც სახელმწიფო უსაფრთხოების სამსახური აპირებს, საუბარი გვექნება ასევე ჰუმანიტარულ თემებზე და საჭიროებებზე, რაც ოკუპირებულ ტერიტორიაზე მცხოვრებ ადამიანებს განსაკუთრებით გაუჩნდათ პანდემიის პირობებში. იმედი გვაქვს, რომ ოკუპირებულ ტერიტორიაზე მცხოვრებ ადამიანებს მიეცემათ კონტროლირებად ტერიტორიაზე თავისუფალი გადმოსვლის საშუალება და იმ სამედიცინო სერვისებზე წვდომა, რომელსაც ჩვენ მოსახლეობას ვთავაზობთ საქართველოს დანარჩენ ტერიტორიაზე. ახალგორში მაცხოვრებელი ადამიანების უფლებრივი მდგომარეობის შესახებ საკითხი იქნება დღეს ერთ-ერთი მთავარი განხილვის თემა. ჩვენ მაქსიმალურად ვცდილობთ ყველანაირი პირობა შევუქმნათ იმ ადამიანებს, ვინც ოკუპირებულ ტერიტორიაზე ცხოვრობს, ეს იქნება საერთაშორისო თანამეგობრობის თუ სხვადასხვა არხების მეშვეობით, საოკუპაციო რეჟიმთან ამ თემებზე უნდა ვილაპარაკოთ და მოვახერხოთ, რომ ამ ადამიანებმა შეძლონ თავისუფლად გადაადგილება კონტროლირებად ტერიტორიაზე“ - აღნიშნა ზვიად ზვიადაძემ.

ინციდენტების პრევენვიისა და მათზე რეაგირების მექანიზმის ფარგლებში 98-ე შეხვედრა დღეს ხუთთვიანი პაუზის შემდეგ, კოვიდრეგულაციების დაცვით გაიმართება. ქართული მხარე საოკუპაციო ძალების მიერ უკანონოდ დაკავებული საქართველოს მოქალაქეების ზაზა გახელაძის, გენადი ბესტაევის, ლაშა ხეთერელისა და რამაზ ბეღელურის უკანონო პატიმრობიდან უპირობოდ გათავისუფლებას მოითხოვს.