ნიკოლოზ სამხარაძე: ძალიან სამწუხაროა, რომ პოლიტიკური სპექტრი ელემენტარულ ჭეშმარიტებაზე ვერ თანხმდება და ევროკავშირის მხრიდან ფასილიტაცია ხდება საჭირო

როდესაც ბატონი დანიელსონი ჩამოვა ის შეხვდება როგორც ოპოზიციის წარმომადგენლებს ასევე ხელისუფლების წარმომადგენლებს. შემდეგ შედგება გაფართოებული შეხვედრაც სადაც ყველანი ერთად იქნებიან წარმოდგენილნი შესაბამისად ამ შეხვედრაზე შეიძლება რაიმე კონკრეტული ნაბიჯები იქნას გადადგმული, - ამის შესახებ „დღის ქრონიკის“ ეთერში პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ განაცხადა.

„შესაძლოა ამ ერთი შეხვედრით ჩვენ შეთანხმებამდე ვერ მივიდეთ თუმცა, რაიმე ტიპის პროგრესს მე ველი და იემედიანად ვარ განწყობილი იქედან გამომდინარე, რომ ეს დაძაბულობა ჩვენს ოპოზიციურ სპექტრსაც არ უნდა აწყობდეს თუ ისინი რუსეთის თამაშს არ თამაშობენ. თუ მათ ჭეშმარიტად სურთ ამ ქვეყანაში სტაბილურობა, ქვეყნის განვითარება და დაძაბულობის მოხსნა ევროკავშირის მედიაციაზე უარი არ უდნა თქვან და კონსტრუქციული ნაბიჯები უნდა გადმოდგან . საქართველოს ხელისუფლებაც მზად არის, რომ კონსტრუქციული ნაბიჯები გადადგას“, - განაცხადა სამხარაძემ.

მისივე თქმით, ძალიან სამწუხაროა, რომ პოლიტიკური სპექტრი ელემენტარულ ჭეშმარიტებაზე ვერ თანხმდება და ევროკავშირის მხრიდან ფასილიტაცია ხდება საჭირო.

„ეს არის ჩვენი პოლიტიკური კლასის უმწიფრობის მაჩვენებელი. რატომ მივედით აქამდე, ამას მარტივი ახსნა აქვს. რიგმა ოპოზიციურმა პარტიებმა, რომელთაც რატომღაც ეგონათ, რომ ამ არჩევნებში წარმატებას მიაღწევდნენ, ვერ მიაღწიეს წარმატებას, ვერ მოიპოვეს ამომრჩევლის ნდობა იმ დოზით, რომ მოსულიყვნენ ხელისუფლებაში და გადაწყვიტეს, რომ პარლამენტის ბოიკოტირების გზით მთელი ქვეყანა მუდმივი დაძაბულობისა და არეულობის რეჟიმში ემყოფებინათ. ეს არის ძალიან მარტივი ახსნა“, - განაცხადა სამხარაძემ.