არჩილ თალაკვაძე: ირაკლი ღარიბაშვილის ვიზიტი დაეხმარება შეთანხმების მიღწევასაც

ბრიუსელში ირაკლი ღარიბაშვილის ვიზიტი დაეხმარება შეთანხმების მიღწევასაც. ამის შესახებ პარლამენტის თავმჯდომარემ ევროპული საბჭოს პრეზიდენტის წარმომადგენელ, კრისტიან დანიელსონთან შეხვედრის შემდეგ ჟურნალისტებს განუცხადა.

„ბრიუსელთან ტელეხიდი არ ყოფილა, იგივე ფორმატში ჩატარდა შეხვედრა. მინდა გითხრათ, რომ ძალიან მნიშვნელოვანი ვიზიტი აქვს პრემიერ-მინისტრს. დარწმუნებული ვარ, რომ საკითხები, მათ შორის საქართველოს ხელისუფლების გეგმები, ბრიუსელში პოზიტიურად განიხილება.

მეორე მხრივ, ვფიქრობ, რომ ეს ვიზიტი დაეხმარება შეთანხმების მიღწევასაც, ვინაიდან აქამდე ყოველთვის ვცდილობდით, რომ ჩვენი ევროპელი კოლეგები, ამერიკელი პარტნიორები ინფორმირებული ყოფილიყვნენ პროცესებთან დაკავშირებით. დღეს, ირაკლი ღარიბაშვილს უშუალოდ ექნება ამის შესაძლებლობა ბრიუსელში, მაღალი რანგის პოლიტიკოსებთან“, - განაცხადა არჩილ თალაკვაძემ.

ევროპული საბჭოს პრეზიდენტის, შარლ მიშელის პირადი წარმომადგენელი კრისტიან დანიელსონი საქართველოში კიდევ ერთი დღით დარჩა და პოლიტიკური პარტიების წარმომადგენლებთან შეხვედრებს დილიდან განაგრძობს. დღეს ცნობილი გახდა, რომ დანიელსონი საქართველოში შეთანხმების მიღწევამდე დარჩება.