ზურაბ ჯაფარიძე: მომლაპარაკებლებმა ვერ შეძლეს დაედოთ რამე დოკუმენტი, რასაც „ქართული ოცნება“ დაეთანხმებოდა

მომლაპარაკებლებმა მთელი ამ დღეების განმავლობაში ვერ შეძლეს დაედოთ რამე დოკუმენტი, რასაც „ქართული ოცნება“ დაეთანხმებოდა, - ამის შესახებ „გირჩი – მეტი თავისუფლების“ ლიდერმა, ზურაბ ჯაფარიძემ ევროკავშირის წარმომადგენლობის ოფისში ხელისუფლებასა და ოპოზიციას შორის გამართული შეხვედრის დასრულების შემდეგ განაცხადა.

მისი თქმით, „ქართული ოცნების“ პრეტენზიები იყო ამოუწურავი და საბოლოო ჯამში მოხდა ის, რაც მოხდა.

„პირველ რიგში მადლობა მინდა გადავუხადო ყველა ჩვენს მეგობარს, ვინც ჩართული იყო ამ მოლაპარაკების პროცესში, ევროკავშირის ელჩს, აშშ-ის ელჩს და შარლ მიშელის წარმომადგენელს, დანიელსონს, რომელმაც უამრავი დრო და ენერგია დახარჯა იმაზე, რომ რამე სახის შეთანხმებამდე მივსულვიყავით.

ყველამ ვნახეთ, რა მდგომარეობაში წავიდა ეს ადამიანი აქედან და არავინ მინდა იფიქროს, რომ ოპოზიციას რამე კავშირი აქვს იმასთან, რა მდგომარეობაშიც ეს ადამიანი იყო ჩავარდნილი. ამ ადამიანის აღელვება, წასვლა და თავიდან ბოლომდე ყველაფერზე პასუხისმგებლობა ეკისრება „ქართულ ოცნებასა“ და მათ ქცევას.

მოლაპარაკების პროცესი არც ერთ მომენტში არც კი მისულა ახლოს, რომ სერიოზულად განხილულიყო ოპოზიციის ხედვები და პოზიციები. მომლაპარაკებლებმა მთელი ამ დღეების განმავლობაში ვერ შეძლეს დაედოთ რამე დოკუმენტი, რაზეც „ქართული ოცნების“ მხრიდან იქნებოდა თანხმობა. მათი პრეტენზიები იყო ამოუწურავი და საბოლოო ჯამში მოხდა ის, რაც მოხდა და როგორც დასრულდა ეს მოლაპარაკებები. არ მჯერა, რომ „ქართულ ოცნებას“ არ ესმის, რას ნიშნავს ამხელა ყურადღება დასავლეთიდან მთელ ამ პროცესზე, არ ესმით, რას ნიშნავს, რომ პროცესში ჩართული იყო ევროსაბჭოს პრეზიდენტი და მან საკუთარ თავზე აიღო ეს პასუხისმგებლობა. საკუთარი და ევროკავშირის რეპუტაცია დადო სასწორის პინაზე. ერთადერთი ახსნა იმ ყველაფერზე, რაც დღეს ნახეთ, არის ის, რომ ამ ხალხს ფეხზე ჰკიდია ევროკავშირიც, ევროსაბჭოს პრეზიდენტიც, მათი რეპუტაციაც და ზოგადად საქართველოს ევროატლანტიკური მისწრაფებებიც. ეს არის ერთადერთი ლოგიკური ახსნა ამ ყველაფრის“, - განაცხადა ზურაბ ჯაფარიძემ.