ვიოლა ფონ კრამონი: საქართველოს დესტაბილიზაცია ყოველთვის იყო პუტინის მიზანი, ახლა ამას აღწევს ისე, რომ ჩარევაც არ სჭირდება

საქართველოს დესტაბილიზაცია ყოველთვის იყო პუტინის მიზანი, ახლა კი ამას აღწევს ისე, რომ ჩარევაც არ სჭირდება. ეს არ უნდა დავუშვათ, – ამის შესახებ საქართველოს პირველ არხთან ინტერვიუში ევროპარლამენტარმა, ვიოლა ფონ კრამონმა განაცხადა.

საქართველოში ხელისუფლებასა და ოპოზიციას შორის მიმდინარე მოლაპარაკებების პროცესზე საუბრისას ვიოლა ფონ კრამონმა სთხოვა ყველას, იფიქრონ სამშობლოზე და მოიქცნენ პასუხისმგებლიანად.

„იმედი მაქვს, რომ ქართველი ხალხი ჰკითხავს თავის ლიდერებს, რა გააკეთეს ამ თვეების განმავლობაში, სად არის ის, რასაც ჰპირდებოდნენ არჩევნებამდე. მედიაც უნდა იყოს კრიტიკული, რადგან პოლიტიკური თამაშების დრო დასრულდა, ამის ნაცვლად საჭიროა სერიოზული წინადადებები კრიზისის გადასაჭრელად. ვიცი, რომ ეს იოლი არ არის. ვიცი, რომ „ქართული ოცნებაც“ და ოპოზიციაც ხანდახან ძალიან ჯიუტია, მაგრამ კომპრომისების გარეშე უბრალოდ ჩიხში შევალთ. ვიცი, ვინ მოიგებს ამით. ეს არ არის ევროკავშირი და აშშ. ეს არც საქართველო იქნება, ეს იქნება ის კაცი კრემლში. ამიტომ ეს არავის ინტერესებში არ შედის. საქართველოს დესტაბილიზაცია ყოველთვის იყო პუტინის სურვილი და მიზანი. ახლა ის ამ მიზანს აღწევს, თან ისე, რომ თავად ჩარევაც არ სჭირდება. ამიტომ ეს არ უნდა დავუშვათ.

საქართველოში ჩვენ ჯერ კიდევ ვხედავთ პოლიტიზებულ მართლმსაჯულებას და ეს მართლმსაჯულების ყოვლისმომცველი რეფორმის გზით უნდა დავძლიოთ. ამის ფარგლებში ჩვენ უნდა შევქმნათ სხვადასხვა ინსტრუმენტი, თუ როგორ შეიძლება ამ კონკრეტული პირების ამნისტიის საკითხის გადაწყვეტა. მე იმედი მაქვს, რომ წარმოვადგენთ ამნისტიის შესახებ კანონპროექტს, რომელიც ორივე მხარისთვის იქნება მისაღები. ჩემი აზრით, ეს უნდა იყოს მოლაპარაკებების საგანი, როდესაც დიალოგი გაგრძელდება. ეს უნდა იყოს პაკეტის ნაწილი. არ აღვიქვამ ამას კრიტიკულ მომენტად. ვფიქრობ, რომ მანევრებისთვის სივრცე არსებობს. იმედი მაქვს, რომ ეს იქნება შანსი საქართველოსთვის გადავლახოთ ეს არარეფორმირებული მართლმსაჯულება, როგორც ასეთი. ჩემთვის ეს პატიმრები არიან უფრო დიდი პრობლემის ნაწილი. ეს არ არის ერთი ინდივიდუალური პატიმარი, არამედ ჩემთვის ეს არის ზოგადად, პოლიტიზებული მართლმსაჯულების საკითხი საქართველოში.

ვისურვებდი, მეთქვა, რომ შემდეგი თვითმფრინავით მოვფრინავთ საქართველოში, მაგრამ ევროპარლამენტის თავმჯდომარე ნებართვას არ გვაძლევს და შეზღუდული ვართ ამ ციფრული ფორმატით, რეალური მოლაპარაკებების ონლაინ რეჟიმში წარმართვა არ არის შესაძლებელი. ამიტომ გვაქვს ეს ბარიერი, ამიტომ ვერ ვიქნებით მოლაპარაკებების ჯგუფში, მაგრამ ვგეგმავთ მომავალში ჩამოსვლას და იმედი გვაქვს, როდესაც პანდემია დასრულდება, შევქმნით ჯგუფს, რომელშიც მოქმედი და ყოფილი პოლიტიკოსებიც იქნებიან. შესაძლოა, ეს იყოს შერეული ჯგუფი ევროპიდან და აშშ-დან და შემდეგ დავუჭერთ მხარს ამ მოლაპარაკებებს.

ვთხოვ ყველას, იფიქრეთ თქვენს სამშობლოზე და მოიქეცით პასუხისმგებლიანად“, – განაცხადა ვიოლა ფონ კრამონმა.