ირაკლი ქადაგიშვილი: ჩვენ აბსოლუტურად ღია ვართ კონსტრუქციული მოლაპარაკებისთვის

ერთადერთი რაზეც ჩვენ უარი ვთქვით, ეს არის კაპიტულაცია და ხელისუფლების ჩაბარება, ეს არის წითელი ხაზი, - ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.

მისი თქმით, ოპოზიციას მნიშვნელოვანი წინადადებები შესთავაზეს, რომელთა გარშემოც შეიძლებოდა შეთანხმების მიღწევა.

„საუბარი იმაზე, რომ მოდით ახლა თქვენ ყველაფერი გვერდზე გადადეთ და მოაწერეთ ხელი აქ ჩუმ კაპიტულაციას, რა თქმა უნდა, ეს ვერ და არ მოხდება, რადგან ამის საფუძველი არ არსებობს და მეორე, ღიაა პარლამენტის კარიც და ციხისაც, ვისაც სურს გამოვიდეს“, - განაცხადა ქადაგიშვილმა.

მისივე თქმით, მოლაპარაკებას ყოველთვის აქვს პერსპექტივა, რადგან ბუნებაში არ არსებობს მუდმივი ომისა და დაძაბულობის რეჟიმი, ყოველთვის რაღაცას თავისი ლოგიკური დასასრული აქვს.

„მოლაპარაკება ამა თუ იმ ფორმატით აუცილებლად გაგრძელდება, ამ ფორმატში კოლექტიური მონაწილეობა ექნება ოპოზიციას თუ ინდივიდუალური, ამას დრო გვაჩვენებს. ჩვენ ვამბობთ, რომ აბსოლუტურად ღია ვართ კონსტრუქციული მოლაპარაკებისთვის, ნურავინ ნუ დააყენებს ამ მოლაპარაკებაზე ისეთ საკითხს, რაც ბუნებაში არ შეიძლება რომ მოლაპარაკების საგნად იქცეს. შენ როდესაც ადამიანს ეუბნები, რომ წადი და მე შენს ადგილზე უნდა მოვიდე, ამის საფუძვლად არგუმენტი მხოლოდ ის გაქვს, რომ მე ესე მინდა, ეს არ არის მოლაპარაკება. ჩვენ ვეუბნებით, რომ რეფორმების გარშემო მზად ვართ, შევთანხმდეთ, ვიმუშაო, შევიკრიბოთ და მეორე თემა არის, ჩვენ ნუ გვავიწყდება, რომ არსებობს კიდევ რვა მარტის შეთანხმება, რომლის უხეში დარღვევა ოპოზიციის მხრიდან რამოდენიმეჯერ მოხდა მოხდა“, - განაცხადა ირაკლი ქადაგიშვილმა.

18 მარტს „ქართულ ოცნებასა“ და ოპოზიციას შორის უცხოელი პარტნიორების მედიატორობით გამართული ხანგრძლივი მოლაპარაკებები კონკრეტული შეთანხმების გარეშე დასრულდა. ევროპული საბჭოს პრეზიდენტის, შარლ მიშელის წარმომადგენელმა განაცხადა, რომ კრიზისის გადაწყვეტა დამოკიდებულია საქართველოს პოლიტიკურ ლიდერებზე. კრისტიან დანიელსონმა, რომელმაც ბრიუსელში დაბრუნების გადაწყვეტილება მიიღო, იმედი გამოთქვა, რომ პარტიები სერიოზულად დაფიქრდებიან ვითარებაზე, გასავლელ გზაზე და ექნებათ საჭირო ნება და სურვილი, წავიდნენ კომპრომისზე.

დღეს ოპოზიცია კვლავ შეიკრიბა. შეხვედრის დასრულების შემდეგ, მათ კვლავ აქციები დააანონსეს.