სოზარ სუბარი: სასამართლო რეფორმაზე ოპოზიციასთან ერთად ვერ ვიმსჯელებთ, თუ ისინი პარლამენტში არ შემოვლენ

სასამართლოს რაც შეეხება, არსებობს ნდობის რამდენიმე კრიტერიუმი. ფრანგული IPSOS-ის მიერ ჩატარებული კვლევით, საქართველოში სასამართლოს მიმართ ნდობა არის ისეთივე, როგორც ამ მხრივ მოწინავე ევროპულ ქვეყნებში. ევროსასამართლოში გაგზავნილი საჩივრების რაოდენობამ დაახლოებით 6-7-ჯერ იკლო, - ამის შესახებ ტელეკომპანია „იმედის“ გადაცემაში „იმედის ფაქტორი“ საპარლამენტო უმრავლესობის წევრმა, სოზარ სუბარმა განაცხადა.

„ოპოზიცია გვეკითხება, რა დათმობაზე მიდიოდა მმართველი გუნდი? ერთი მხრივ, იაგო ხვიჩია ამბობს, რომ არჩევნები არ გაყალბებულა, თუმცა ისინი მაინც არ შევლენ პარლამენტში, თუ ხელისუფლება დათმობაზე არ წავა. ყველაფერი აკინძულია იმაზე, რომ თითქოს არჩევნები გაყალბდა. ახლა ირკვევა, რომ არჩევნები არ გაყალბებულა, მაშინ რატომ უნდა წავიდეს ხელისუფლება დათმობაზე? IRI-ის კვლევით, გამოკითხულთა 85% ამბობს, რომ ოპოზიცია პარლამენტში უნდა შევიდეს. რა დევს მოლაპარაკების მაგიდაზე? საარჩევნო რეფორმა მიდის და მასში გათვალისწინებულია თითქმის ყველა პუნქტი. მაგალითად, არ მიმაჩნია, რომ თვითმმართველობის არჩევნებზე ნაკლები მაჟორიტარი არის კარგი. თუნდაც ჩემს სოფელს, ჭუბერს უნდა ჰყავდეს თავისი მაჟორიტარი და არა საერთო - სამ სოფელთან. არ ვეთანხმები უპროცენტო საარჩევნო ბარიერს, მაგრამ ვეთანხმები 3%-იან ბარიერს. სასამართლოს რაც შეეხება, არსებობს ნდობის რამდენიმე კრიტერიუმი. ფრანგული IPSOS-ის მიერ ჩატარებული კვლევით, საქართველოში სასამართლოს მიმართ ნდობა არის ისეთივე, როგორც ამ მხრივ მოწინავე ევროპულ ქვეყნებში. ევროსასამართლოში გაგზავნილი საჩივრების რაოდენობამ დაახლოებით 6-7-ჯერ იკლო. თუ წელიწადში 600-800 საჩივარი მიდიოდა, ახლა 120-ზე მეტი არ წასულა არცერთ წელს. ეს არის ობიექტური რეალობა. ესეც მეტყველებს სასამართლოს მიმართ მაღალ ნდობაზე. ეს არ ნიშნავს, რომ ყველა მოსამართლე კარგია, ან ყველა ცუდია. ასე არ ხდება არცერთ ევროპულ ქვეყანაში. მიუხედავად ამისა, სასამართლო რეფორმა გრძელდება და მასზე ვერ ვიმსჯელებთ ოპოზიციასთან ერთად, თუ ისინი პარლამენტში არ შემოვლენ“, - განაცხადა სუბარმა.