იაგო ხვიჩია: „ნაციონალურ მოძრაობასთან“ და სხვებთან მეგობრობა იმიტომ არ დაგვიწყია, რომ ისინი გვიყვარდნენ - გვინდოდა პროპორციული არჩევნები ბუნებრივი ბარიერით

„ნაციონალურ მოძრაობასთან“ და სხვა პარტიებთან მეგობრობა ჩვენ იმის გამო ხომ არ დაგვიწყია, რომ ისინი გვიყვარდნენ, არამედ იმის გამო, რომ გვინდოდა პროპორციული არჩევნები ბუნებრივი ბარიერით, - ამის შესახებ „გირჩის“ ერთ-ერთმა ლიდერმა, იაგო ხვიჩიამ გადაცემაში „იმედის ფაქტორი“ განაცხადა.

მისივე განცხადებით, ხელისუფლებასა და ოპოზიციას შორის მოლაპარაკების პერსპექტივა არსებობდა, თუმცა, ხელისუფლებას პარლამენტში მათი შესვლა არ უნდა.

„რომ დავინახეთ, რომ ხალხი რაღაცებს ითხოვს და ვადამდელი არჩევნების საკითხზე, კრიზისში კიდევ უფრო აღმოვჩნდეთ, ჩვენ შემოვიტანეთ ჩვენი თემა, რომელიც გვაინტერესებდა და რომელიც არავის არ იყო წითელი ხაზი და ეს პარლამენტი თუ ამას მიიღებდა, უკვე ძალიან დიდი საქმე იქნებოდა. იქედან გამომდინარე, რომ ჩვენ მომავალში ერთპარტიული მმართველობის საფრთხე არ გვემუქრებოდა. ეს იყო ჩვენი პირობა ხელისუფლებასთან და ოპოზიციასთანაც. პარლამენტში შესვლა მეგობრებთან ერთად კი არ მინდოდა, პროპორციული არჩევნების შესაცვლელად. ვამბობდი, რომ ეს რომ დადოს „ქართულმა ოცნებამ“, მე ეჭვი არ მეპარება, რომ „ნაციონალურ მოძრაობას“ პარლამენტში შემოვა. ამიტომ მე შემოვალ „ნაციონალურ მოძრაობასთან“ ერთად - ეს იყო ფორმულა, თუმცა პრობლემა შეიქმნა არა მარტო „ნაციონალური მოძრაობის“ მხარეს, არამედ „ქართული ოცნების“ მხარეს. ჩვენ ვუთხარით „ქართულ ოცნებას“, რომ ჩვენ კოლეგებს პარლამენტში შემოსვლაში დავარწმუნებდით. თუ ვერ დავარწმუნებდით, წავაგებდით და წაგებულები შევიდოდით პარლამენტში. ეს გვესმოდა. შეიძლება, ვრისკავდით, მაგრამ გვესმოდა, რაზეც მივდიოდით. „ქართული ოცნება“ დარწმუნებულია, რომ „ნაციონალური მოძრაობა“ არცერთ შემთხვევაში არ შემოვა პარლამენტში. მე დარწმუნებული ვარ იმაში, რომ თუ ესენი პროპორციულ არჩევნებს დადებენ, იქ შევა ყველა. საქმე იმაშია, რომ, მგონი, მოლაპარაკებების დროს, „ქართული ოცნება“ დავარწმუნე იმაში, რომ „ნაცები“ მართლა შემოდიოდნენ და მათ არ დადეს პროპორციული არჩევნები. გასაგებია, რომ ეს ოპოზიციის პრობლემაა, მაგრამ ჩვენ ხომ, ფაქტობრივად, ოპოზიციას გავემიჯნეთ იმ თვალსაზრისით, რომ ჩვენი შესვლა-არშესვლა მათ არ დავუკავშირეთ. ეს დავუკავშირეთ პროპორციული არჩევნების მიღება-არმიღებას. არ უნდა ხელისუფლებას ჩვენი პარლამენტში შესვლა, მარტო უნდათ იქ ჯდომა“ - განაცხადა იაგო ხვიჩიამ.