ხელისუფლების და სასამართლოს არაფორმალურ კავშირებზე მესამე სექტორი საგანგებო განცხადებას ავრცელებს

ხელისუფლების და სასამართლო სისტემის არაფორმალურ კავშირებზე არასამთავრობო ორგანიზაციებმა საგანგებო განცხადება გაავრცელეს. 

ამ განცხადებით არასამთავრობოები 10 ივლისს მედიაში გავრცელებულ ინფორმაციას გამოეხმაურნენ, სადაც პარლამენტის იურიდიული კომიტეტის თავმჯდომარის მოადგილე ვანო ზარდიაშვილს, თბილისის სააპელაციო სასამართლოს თავმჯდომარე მიხეილ ჩინჩალაძესა და იუსტიციის უმაღლესი საბჭოს ახალ მდივან გიორგი მიქაუტაძის შორის არაფორმალურ გარემოში შეხვედრაა ასახული.

მედიაში ასევე გავრცელდა ფოტო, სადაც საბჭოს ახალი მდივანი, „ქართული ოცნების“ სხვა ლიდერებთან და მთავარი პროკურორის მოადგილესთან ერთადაა გადაღებული.

„არასამთავრობო ორგანიზაციებმა არაერთხელ დააფიქსირეს, რომ დღეის მდგომარეობით სასამართლოს სისტემის უმთავრეს პრობლემას კლანური მმართველობა წარმოადგენს, რომელიც ხელისუფლების მხრიდან არის მხარდაჭერილი. ჩვენი ინფორმაციით, სასამართლოს გავლენიან ჯგუფებთან საკონტაქტო პირს მმართველი ძალიდან სწორედ ვანო ზარდიაშვილი წარმოადგენს. ვანო ზარდიაშვილს ახლო ნათესაური და მეგობრული კავშირები აქვს სასამართლო სისტემის ყველაზე გავლენიან პირებთან მიხეილ ჩინჩალაძესა და იუსტიციის უმაღლეს საბჭოში ლევან მურუსიძის შემცველელ გიორგი მიქაუტაძესთან. ასევე, ვანო ზარდიაშვილის მეუღლე იუსტიციის უმაღლეს საბჭოში გამოსაცდელი ვადით გამწესებული მოსამართლეების საქმიანობის შეფასების მართვის დეპარტამენტს ხელმძღვანელობს“, - წერია გავრცელებულ განცხადებაში.

გავრცელებულ მიმართვაში სამოქალაქო სექტორი ხელისუფლებას მსგავსი არაფორმალური შეხვედრების აღკვეთისკენ მოუწოდებს.

„იმ შემთხვევაში თუ მსგავსი პრაქტიკა გაგრძელდება და ხელისუფლება სასამართლოს სისტემის გაჯანსაღების რეალურ პოლიტიკურ ნებას არ გამოავლენს, ყოველგვარი შემდგომი რეფორმა ისევე დაკარგავს აზრს, როგორც ხელშესახები შედეგი ვერ გამოიღო აქამდე სამ „ტალღად” განხორციელებულმა საკანონმდებლო რეფორმებმა“, - ნათქვამია განცხადებაში.