შალვა პაპუაშვილი: ივანიშვილი პოლიტიკას ჩამოცილებულია, სააკაშვილის პოლიტიკაში ჩართვა კი მიუღებელია

ბიძინა ივანიშვილი ჩამოცილებულია აქტიურ პოლიტიკას და არ არსებობს საფუძველი, ვინმემ ეს ეჭვქვეშ დააყენოს. მე თავად ვარ პოლიტიკური საბჭოს წევრი, ამიტომ სრული პასუხისმგებლობით შემიძლია გითხრათ, რომ გადაწყვეტილებები მიიღება პოლიტსაბჭოსა და საპარალამენტო უმრავლესობაში, - ამის შესახებ „ქართული ოცნების“ საზოგადოებასთან ურთიერთობის მდივანმა, შალვა პაპუაშვილმა განაცხადა.

როგორც პაპუაშვილმა ჟურნალისტებს ევროპარლამენტარ კუბილიუსის მოსაზრების თაობაზე განუცხადა, საფუძველი, რომ მიხეილ სააკაშვილმა მოლაპარაკებებში აქტიური მონაწილეობა მიიღოს, არ არსებობს.

„ეს შედარებები მიუღებელია, პირველ რიგში, იმიტომ, რომ ბიძინა ივანიშვილი ჩამოცილებულია აქტიურ პოლიტიკას და არანაირი საფუძველი არ არსებობს, ვინმემ ეს ეჭვის ქვეშ დააყენოს. მე თავად ვარ პოლიტიკური საბჭოს წევრი, ამიტომ სრული პასუხისმგებლობით შემიძლია გითხრათ, რომ გადაწყვეტილებები მიიღება პოლიტსაბჭოსა და საპარალამენტო უმრავლესობაში.

რაც შეეხება მიხეილ სააკაშვილის პოლიტიკაში ფორმალურად თუ ოფიციალურად ჩართვას, ესეც მიუღებელია. პირველი მიზეზი არის გირგვლიანის საქმე, რომელზეც სააკაშვილს მისჯილი აქვს 3-წლიანი თავისუფლების აღკვეთა, მეორე - ვალერი გელაშვილის ცემის საქმე, რაზეც მისჯილი აქვს 6-წლიანი პატიმრობა, მესამე - ტელე „იმედის“ საქმე, მეოთხე მიზეზი - სახელმწიფო დაცვის ბიუჯეტის 9 მლნ ლარის გაფლანგვა, რომელზეც სასამართლო განხილვა მიმდინარეობს და ბოლო, მეხუთე მიზეზი - მიხეილ სააკაშვილმა უარი თქვა საქართველოს მოქალაქეობაზე და თი არ ვცდები, 2015 წლიდან ის უკრაინის მოქალაქეა, ამიტომ რამე საფუძველი, რომ აქტიურად მიიღოს მონაწილეობა მოლაპარაკებებში, არ არსებობს“, - განაცხადა შალვა პაპუაშვილმა.

ევროპარლამენტარმა, ანდრიუს კუბილიუსმა განაცხადა, რომ ეფექტური იქნება, თუ პოლიტიკურ დიალოგში მონაწილეობას ბიძინა ივანიშვილი და მიხეილ სააკაშვილი მიიღებენ.