მამუკა მდინარაძე: სამწუხაროდ, ქართული არასამთავრობო ორგანიზაციების საკმაოდ მნიშვნელოვან ნაწილს მიაჩნია, რომ გიორგი რურუა კრიმინალი არ არის

სამწუხაროდ, ქართული არასამთავრობო ორგანიზაციების საკმაოდ მნიშვნელოვან ნაწილს მიაჩნია, რომ გიორგი რურუა კრიმინალი არ არის, - ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.

მან კომენტარი აშშ-ის სახელმწიფო დეპარტამენტის ანგარიშზე გააკეთა.

„როდესაც ადამიანის უფლებების შესახებ აშშ-ის სახელმწიფო დეპარტამენტი ანგარიშს წარადგენს ხოლმე, ის ხელისუფლებების ქება-დიდებას არცერთ ქვეყანაში არ შეეხება. ანგარიში არის იმ ნაწილზე, რომელიც შეიძლება იყოს კრიტიკული, მათ შორის უამრავი ციტირებაა ადგილობრივი სექტორიდან მიწოდებული ინფორმაციის. ასეთ შემთხვევებზე აღნიშნულია, როგორც ადგილობრივი არასამთავრობო ორგანიზაციების ციტირება.

დიახ, ქართული არასამთავრობო ორგანიზაციები ნამდვილად აწვდიან ინფორმაციას სახელმწიფო დეპარტამენტსა და კონკრეტულ პერსონებს, რომლებიც მუშაობენ ადამიანის უფლებებზე, რომ თითქოს, საქართველოში გიორგი რურუა პოლიტპატიმარია. დიახ, მე ამას გიდასტურებთ. სამწუხაროდ, ქართული არასამთავრობო ორგანიზაციების საკმაოდ მნიშვნელოვან ნაწილს მიაჩნია, რომ გიორგი რურუა კრიმინალი არ არის (კრიმინალური ავტორიტეტი არაა და ამის თქმას ვერ ბედავს) და მათაც მიაჩნიათ, რომ გიორგი რურუა არის პოლიტპატიმარი“, - განაცხადა მდინარაძემ.

უმრავლესობის ლიდერი აღნიშნულ ანგარიშში მსგავსი ფაქტების არსებობას ხელისუფლების კომუნიკაციის პრობლემად მიიჩნევს.

„კომუნიკაციის პრობლემაა თუ ასე შემდეგ, ეს პრობლემაა ხელისუფლების, მათ შორის ჩვენიც, როდესაც შენი ქვეყნის არასამთავრობო სექტორი ცდილობს, შეცდომაში შეიყვანოს ყველა და მათი მნიშვნელოვანი ნაწილი ამას ხანდახან ახერხებს კიდევაც, მაგრამ მე არ ვსაუბრობ, რომ ვინმე შეცდომაშია შეყვანილი. ისინი ციტირებას ახდენენ, რომ „ქართული არასამთავრობო სექტორი ამას ამბობს“. ეს ყურადსაღებია და ამ მიმართულებითაც სამუშაოა. თუმცა, როდესაც საკუთარ პოზიციას აფიქსირებენ, ჩვენ მოვისმინეთ სენატში მათი წარმომადგენელი კენტის პოზიცია, რომელიც ამ საკითხებზე კონკრეტულ მესიჯებს ახმოვანებდა. მაგალითად, არათუ რურუაზე, ნიკა მელიაზე ამბობდა, რომ მან დაარღვია კანონი და იქ პოლიტიკური კონტექსტი მოხსენიებული არ იყო“, - განაცხადა მდინარაძემ.