დიმიტრი ხუნდაძე: ვლადიმერ პოზნერისა და მისი თანამოაზრეების სტუმრობაც პროვოკაციული იყო და მასპინძლობაც

რუსი ჟურნალისტის, ვლადიმერ პოზნერის საქართველოში ჩამოსვლას საპარლამენტო უმრავლესობის წევრი დიმიტრი ხუნდაძე გამოეხმაურა. მისი განცხადებით, პოზნერისა და მისი თანამოაზრეების სტუმრობაც პროვოკაციული იყო და მასპინძლობაც.

„პროტესტის მესმის, მაგრამ ფორმა არ მომწონს. ამ კულტურისა და ტრადიციების მქონე ქვეყნისთვის ეს ფორმა შეუთავსებელია, თუმცა როგორც ხშირად, მიზანი სხვაა, „შემოქმედი“ - იგივე. საბედნიეროდ, საზოგადოებაც იგივეა და კარგად „ზომავს“ პროტესტის გულწრფელობას და იმას, თუ ვინ აპროტესტებს. ისე რა შინაარსითაც წინააღმდეგობას გამოვხატავთ, ამისთვის თავის დროზე უნდა მოგვეთხოვა პასუხი და არ ავყოლოდით „მარცხის ზეიმად გასაღებას“, ან მინიმუმ დღეს მაინც არ უნდა ვიდგეთ იქ, სადაც მხოლოდ ხელისუფლებაში დაბრუნების ჟინი „თუხთუხებს“, - აცხადებს დიმიტრი ხუნდაძე.

ვლადიმერ პოზნერი საქართველოში 31 მარტს ჩამოვიდა. მის ვიზიტს საქართველოში სამოქალაქო აქტივისტების პროტესტი მოჰყვა, რომლებსაც მოგვიანებით, პოლიტიკოსებიც შეუერთდნენ. მოვლენები ე.წ. კომენდანტის საათის დროს განვითარდა, ამიტომ შრომის ინსპექციამ სასტუმრო „ვინოტელი“, სადაც ვლადიმერ პოზნერი და მისი სტუმრები იმყოფებოდნენ, 10 000 ლარით დააჯარიმა. ამასთან, როგორც შსს-ს წარმომადგენელმა „ქრონიკას“ უთხრა, დაჯარიმდება ყველა, ვინც დაარღვია გადაადგილებაზე დაწესებული შეზღუდვა. ამასთან, შსს-ში განაცხადეს, რომ ვლადიმერ პოზნერი ამერიკის მოქალაქეა და მას კანონი ოკუპაციის შესახებ დარღვეული არ აქვს.

ამასთან, პოლიციამ რუსეთიდან ჩამოსული 32 მოქალაქე, მათ შორის ვლადიმერ პოზნერი იზოლაციისა და კარანტინის წესის დარღვევის ფაქტზე დააჯარიმა.

რუსმა ჟურნალისტმა საქართველო 1-ელ აპრილს, დილით დატოვა.