ირაკლი კობახიძე: ჩვენი მხრიდან იყო მზაობა, ხელი მოგვეწერა დოკუმენტზე, თუმცა საქმე აქამდეც არ მივიდა

ირაკლი კობახიძე: ჩვენ გამოვხატეთ მზაობა, ხელი მოგვეწერა დოკუმენტზე, უბრალოდ, გვსურდა გარკვეული თემების დაზუსტება, თუმცა აქამდეც არ მივიდა საქმე ორი ულტიმატუმის გამო, რომელიც ოპოზიციამ დააყენა, - ამის შესახებ პარტია „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემაში „თავისუფალი ხედვა“ განაცხადა.

მისივე თქმით, „ოცნებას“ მოლაპარაკების პროცესისადმი კონსტრუქციული მიდგომა ჰქონდა.

„რაც შეეხება დოკუმენტსა და მოლაპარაკებებს, ჩვენ გვქონდა აბსოლუტურად კონსტრუქციული მიდგომა. ჩვენ გამოვხატეთ მზადყოფნა, ხელი მოგვეწერა ამ დოკუმენტზე. უბრალოდ, იყო ოთხი კონკრეტული საკითხი, რასთან დაკავშირებითაც გვინდოდა გარკვეული თემების დაზუსტება. გვინდოდა, არგუმენტებით რაღაცების დამატებით განხილვა. ეს იყო: პროკურორის, ცესკოს, საარჩევნო ბარიერთან, შესაძლო რიგგარეშე არჩევნებთან დაკავშირებული თემები და კომიტეტების საკითხი. ამ ოთხ თემაზე გვინდოდა უბრალოდ დამატებით მსჯელობა“, – განაცხადა კობახიძემ.

კობახიძის განმარტებით, მსჯელობამდე საქმე არც მისულა, რადგან ოპოზიციამ ორ საკითხთან დაკავშირებით ულტიმატუმები დააყენა.

„ეს იყო რურუასა და რიგგარეშე არჩევნების ან პლებისციტის საკითხი. რაც შეეხება „ქართული ოცნების“ პოზიციას, ჩვენ არცერთ თემასთან დაკავშირებით არცერთ ამ ოთხ პუნქტთან დაკავშირებით არავითარი ულტიმატუმი არ დაგვიყენებია. ჩვენი მხრიდან იყო ზოგადი მზაობა, რომ ხელი მოგვეწერა დოკუმენტზე, თუმცა საქმე აქამდეც არ მივიდა, ეს იყო მაგიდის გარშემო რეალობა. საუბარი იყო კომიტეტების სხვაგვარად გადანაწილებაზე, პარლამენტში დღეს 16 კომიტეტია, 16-ვე კომიტეტის თავმჯდომარე „ქართული ოცნების“ წარმომადგენელია და საუბარი იყო იმაზე, რომ ხუთი კომიტეტის თავმჯდომარის პოზიცია ოპოზიციაზე უნდა გადანაწილებულიყო.

ჩვენ გვინდოდა, ტექნიკური საკითხების გავლა, მათ შორის გვინდოდა ოპოზიციის საბოლოო პოზიციის მოსმენაც, რადგან მათ გააკეთეს საჯარო განცხადება, რომ ეს კომიტეტები მათ არ აინტერესებდათ. ოპოზიციასთან ამ საკითხის არსებითად გავლა გვინდოდა. წარმოიდგინეთ, რომ წინა დღეს კეთდება საჯარო განცხადება ოპოზიციის მხრიდან, რომ მათ კომიტეტები არ აინტერესებთ, ამის მიუხედავად, ეს პუნქტი მაინც რჩება შეთანხმების ტექსტში. ჩვენ გვინდოდა უბრალოდ ამის დაზუსტება, იგივე რჩებოდა ოპოზიციის დამოკიდებულება საკითხის მიმართ, თუ ეს იყო შეცვლილი, რადგან, ბუნებრივია, ამაზე იყო დამოკიდებული საბოლოო ტექსტის ფორმულირება.

რაც შეეხება პროკურორის არჩევის საკითხს, იქ მეტწილად ტექნიკური, წმინდა სამართლებრივი, საკითხების დაზუსტება გვინდოდა. ცესკოსთან დაკავშირებითაც იგივე იყო. რაც შეეხება შესაძლო რიგგარეშე არჩევნების თემას 2024 წლამდე, ჩვენ აქ გვინდოდა, ძალაში დაგვეტოვებინა 8 მარტის შეთანხმების შესაბამისი პუნქტი, რომელიც ითვალისწინებდა იმას, რომ 2024 წლამდე ნებისმიერი რიგგარეშე არჩევნები იგივე სისტემით უნდა ჩატარებულიყო. ანუ, 120/30-ზე ერთ-პროცენტიანი ბარიერის პირობებში. ეს საკითხი დოკუმენტში არის, საუბარია იმაზე, რომ ყოველი შემდეგი არჩევნები უნდა ჩატარდეს პროპორციული სისტემით, ამაში იგულისხმება მათ შორის 2024 წლამდე ნებისმიერი შესაძლო რიგგარეშე არჩევნები. ჩვენ გვინდოდა, ხელუხლებელი დაგვეტოვებინა 8 მარტის შეთანხმების პუნქტი, რომლის მიხედვითაც, 2024 წლამდე ნებისმიერი რიგგარეშე არჩევნები ტარდებოდა იგივე სისტემით, 120/30-ზე და 2024 წლამდე აირჩეოდა შესაბამისი პარლამენტი.

8 მარტის შეთანხმებაში ეს პუნქტი იმიტომ ჩაიწერა, რომ ჩვენ იმთავითვე გვქონდა საბოტაჟის გარკვეული მოლოდინი, რაც გამართლდა. შესაბამისი პუნქტი არ უნდა იყოს ამოღებული ახალი შეთანხმებიდან. ამაზე იყო საუბარი, თუმცა ამაზეც არ გვქონდა მაინც და მაინც რადიკალური პოზიცია. იყო ოთხი თემა, ოთხივე საკითხთან დაკავშირებით გვქონდა სხვადასხვა მოსაზრება და უბრალოდ, ამის დამატებით განხილვას ვთხოვდით ჩვენ როგორც მოდერატორს, ისე ოპოზიციურ პარტიებს, თუმცა აქამდეც არ მივიდა საქმე იმ ორი ულტიმატუმიდან გამომდინარე, რომელიც ოპოზიციამ იმთავითვე დააყენა, ეს ეხებოდა რურუას და პლებისციტს, რიგგარეშე არჩევნებს“, – განაცხადა ირაკლი კობახიძემ.