სალომე ზურაბიშვილი: როგორ უნდა შევასრულო მედიატორის როლი, როდესაც დამოუკიდებლობის აღდგენის 30 წლისთავისადმი მიძღვნილ ღონისძიებაზე ცარიელი სკამებია?!

ძალიან ძნელი წარმოსადგენია, როგორ უნდა შეასრულოს პრეზიდენტმა მედიატორის როლი, როდესაც საქართველოს დამოუკიდებლობის აღდგენის 30 წლისთავისადმი მიძღვნილ ღონისძიებაზე ცარიელი სკამებია?!, – ამის შესახებ საქართველოს პრეზიდენტმა სალომე ზურაბიშვილმა ორბელიანების სასახლეში ღონისძიებაზე სიტყვით გამოსვლისას განაცხადა.

პრეზიდენტმა მიწვეულ სტუმრებს სიტყვით მიმართა და დღევანდელი დღის მნიშვნელობაზე ისაუბრა. ზურაბიშვილის თქმით, ხშირად ისმის კითხვა, ხელისუფლებისა და ოპოზიციის წარმომადგენლებს შორის შეხვედრებზე რატომ არ ასრულებს პრეზიდენტი მედიატორის როლს.

„მივესალმები აქ მყოფ პოლიტიკურ პარტიებს. ძალიან სამწუხაროა, რომ ამდენი ცარიელი სკამია დღეს პრეზიდენტის სასახლეში, როდესაც ჩვენ აღვნიშნავთ ერთიანობის, დამოუკიდებლობის ისტორიულ დღეს. კიდევ უფრო სამწუხაროა, როდესაც პარტიების ნაწილი მოდიოდა, თუნდაც ნახევარი საათის წინ და ბოლო წუთში რაღაც მოხდა, რაც ალბათ აჩვენებს იმას, რომ ისეთი დამოუკიდებლები არ არიან, როგორც ჩვენ ვისურვებდით, რომ ქვეყანაში ყველა პოლიტიკური პარტია იყოს.

სამწუხაროა ასევე იმიტომ, რომ მე მესმის წამოძახილები, რატომ არ თამაშობს პრეზიდენტი მედიატორის როლს. მეც ვეთანხმები იმაში და ნათქვამიც მაქვს ჩვენი უცხოელი პარტნიორებისთვის, რომ უთუოდ უნდა დადგეს დრო, როდესაც საქართველოს პრეზიდენტი და თვითონ საქართველო იქნება მედიატორი თავისი პოლიტიკური პროცესებისა და არ უნდა ვიყოთ მუდმივად მიბმული იმაზე, რომ ჩვენმა უცხოელმა პარტნიორებმა გადაწყვიტონ და დაგვეხმარონ პროცესებში. ძალიან ძნელი წარმოსადგენია, როგორ უნდა შეასრულოს პრეზიდენტმა მედიატორის როლი, როდესაც ცარიელი სკამებია“, - განაცხადა სალომე ზურაბიშვილმა.

შეხვედრას საქართველოს პირველი პრეზიდენტის მეუღლე, მანანა არჩვაძე-გამსახურდია, პარლამენტის წევრები, დიპლომატიური კორპუსის წარმომადგენლები ესწრებოდნენ. შესაბამისად, ზურაბიშვილმა მათაც მიმართა.

„ყველა ადამიანს, ვინც აქ არის, ძალიან კარგად გვესმის ამ დღის მნიშვნელობა. მინდა, მივესალმო საქართველოს პირველი პრეზიდენტის მეუღლეს, რამეთუ მისი მეუღლე წარმოადგენს დამოუკიდებელ საქართველოს. ის არის ამ დღის ავტორი. რომ არა მისი გადაწყვეტილება, ჩატარებულიყო რეფერენდუმი, ალბათ არც შედეგს მივიღებდით, დამოუკიდებლობის აქტს, რომელმაც დააარსა თანამედროვე საქართველო. არავის აქვს უფლება, ეს უზარმაზარი დამსახურება დაივიწყოს.

მივესალმები აქ მყოფ დიპლომატიური კორპუსის წარმომადგენლებს, რამეთუ ამ 30 წლის განმავლობაში ძალიან მნიშვნელოვანი იყო ჩვენი ევროპელი და ამერიკელი პარტნიორების მხარდაჭერა საქართველოს დამოუკიდებლობისთვის. როგორც ხედავთ, დღესაც ეს არის ძალიან მნიშვნელოვანი ჩვენთვის. ეს მხარდაჭერა ჩვენ კიდევ გვჭირდება ბევრი სხვადასხვა კუთხით, პოლიტიკურად, სტრატეგიულად, ეკონომიკურად და ძალიან მნიშვნელოვანია, რომ ჩვენ ერთად ვართ საქართველოს ევროატლანტიკური ინტეგრაციის გზაზე“, - განაცხადა პრეზიდენტმა.

მისივე თქმით, ასევე სურდა, როგორც წინა წლებში, ღონისძიებაზე მიეწვია უზენაესი საბჭოს წევრები, თუმცა პანდემიიდან გამომდინარე, ყველა მათგანის მიწვევის საშუალება არ ჰქონდა.

„ძალიან ძნელი იქნებოდა, რომ არჩევანი გამეკეთებინა. ამიტომ მინდა, ჩათვალოს თითოეულმა მათგანმა, რომ დღეს აქ არიან, მათი ადგილი ნამდვილადაა საქართველოს ისტორიაში.

ასევე მინდა აღვნიშნო, რომ დღეს დავპატიჟეთ ახალგაზრდული პარლამენტის რამდენიმე წარმომადგენელი. ძალიან მიხარია, რომ აქ იმყოფებიან როგორც სიმბოლო, რომ ახალგაზრდობა, მომავალი თაობა ამ დღეს სრულიად იზიარებს და ეს დღე მათთვის კიდევ უფრო საკრალური უნდა იყოს. ეს დღე არის გარანტია, რომ ჩვენი მომავალი იქნება დამოუკიდებელი, ევროპული ქვეყანა“, – განაცხადა სალომე ზურაბიშვილმა.

1989 წლის 9 აპრილის ტრაგედიიდან 32 წელი შესრულდა. 1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან, მშვიდობიანი საპროტესტო აქცია დაარბიეს, რასაც 21 ადამიანის სიცოცხლე შეეწირა.

აქციის დარბევა დილის 4 საათზე დაიწყო. დარბევისას საბჭოთა კავშირის შეიარაღებული ძალების ნაწილებმა ქიმიური საშუალებები, სასანგრე ბარები, ცეცხლსასროლი იარაღი, ჯავშანმანქანები და ტანკები გამოიყენეს. დარბევის შედეგად ათასობით მოქალაქე მოიწამლა.

1989 წლის 9 აპრილიდან 2 წლის შემდეგ, 1991 წლის 9 აპრილს, საქართველოს უზენაესმა საბჭომ საქართველოს სახელმწიფოებრივი დამოუკიდებლობა აღდგენილად გამოაცხადა.