არჩილ თალაკვაძე: იმედი მაქვს, რომ ოპოზიცია საკუთარ დამოკიდებულებას გადახედავს და შარლ მიშელის ეგიდით შექმნილ დოკუმენტს დაეთანხმება

გამოვხატავთ მზადყოფნას, კარს მომდგარ თვითმმართველობის არჩევნებშიც ავამოქმედოთ მხარდაჭერის 40-პროცენტიანი პრინციპი, - ამის შესახებ „ქართული ოცნების“ ცენტრალურ ოფისში გამართულ ბრიფინგზე პარლამენტის თავმჯდომარემ, არჩილ თალაკვაძემ განაცხადა.

მისი თქმით, 40%-იანი პრინციპი ნიშნავს იმას, რომ თუ მმართველი პარტია არჩევნებში 40 პროცენტს ვერ მიიღებს, ამ შემთხვევაში განხილული იქნება არჩევნებთან დაკავშირებით ოპოზიციის მოთხოვნები.

„მე ვთქვი, რომ „ქართული ოცნება“ მზად არის პრინციპულად შეთანხმებაზე ხელმოსაწერად, თუ ოპოზიცია ამ დოკუმენტს დაეთანხმება. სამწუხაროდ, მაშინ ოპოზიცია ამ დოკუმენტს არ დაეთანხმა, იმედი მაქვს, რომ ისინი გადახედავენ საკუთარ დამოკიდებულებას და ამას დაეთანხმებიან, მით უმეტეს მაშინ, როცა ჩვენ ვზრუნავთ უფრო მაღალ საჯარო ინტერესებზე, ქვეყნის ინტერესებზე და იმ ოპოზიციის ნაწილს, რომელსაც აქვს უფრო კონსტრუქციული დამოკიდებულება, სწორედ იმ ოპოზიციისთვის ჩვენ არამხოლოდ დოკუმენტს ვაწერთ ხელს, არამედ ვაცხადებთ მზადყოფნას, რომ მხარდაჭერის 40%-იანი პრინციპი ავამოქმედოთ. მე ვფიქრობ, რომ ეს მისცემს საშუალებას კონსტრუქციულ ოპოზიციას, რომ ამ გადაწყვეტილებას შეუერთდნენ და თუ მათ მართლა სურთ პარლამენტში შესვლა, ასეც მოიქცნენ.

როდესაც ოპოზიცია კითხვის ნიშნის ქვეშ აყენებს „ქართული ოცნების“ მხარდაჭერას, ჩვენი გუნდი გამოხატავს მზადყოფნას, რომ უპრობლემოდ ჩააბაროს ეს ტესტი თვითმმართველობის არჩევნებში. 40 პროცენტი არის საკმარისი ლეგიტიმაცია, რათა მმართველობის პასუხისმგებლობა მმართველმა პარტიამ აიღოს საკუთარ თავზე. ეს ტესტი ჩვენი მხრიდან არის შეთავაზებული. ვხედავთ, რა მდგომარეობაშია ოპოზიცია, როგორ ცდილობს მისი რადიკალური ნაწილი დესტაბილიზაციას, ხოლო ზომიერი ნაწილი ეძებს გამოსავალს, რომ მიიღოს გადაწყვეტილება ისე, სახის შენარჩუნებაც მოახერხოს. „ქართული ოცნება“ ამ ტესტსაც უპრობლემოდ ჩააბარებს და ამით ოპოზიციის კონსტრუქციულ ნაწილსაც ვთვლით, რომ გავუადვილებთ გადაწყვეტილების მიღებას“, - განაცხადა თალაკვაძემ.

„ქართული ოცნება“ ევროპული საბჭოს პრეზიდენტის, შარლ მიშელის ეგიდით შექმნილ დოკუმენტს ხელს აწერს.