ლევან იოსელიანი: ვფიქრობ, ოპოზიციის ნაწილი დოკუმენტს ხელს მოაწერს, ნაწილი კი თავისი მოთხოვნის ერთგული დარჩება

აუცილებელია, რომ ოპოზიციამ დოკუმენტს ხელი მოაწეროს, რადგან ის არაა შემუშავებული რომელიმე მხარის მიერ, არამედ შედგენილია მედიატორის მიერ, რომელმაც სამართლიანად ორივე მხარის ინტერესები მაქსიმალურად გაითვალისწინა, – ამის შესახებ პარლამენტის ვიცე-სპიკერმა, „მოქალაქეების“ წევრმა, ლევან იოსელიანმა განაცხადა.

მან იმედი გამოთქვა, რომ ოპოზიციის ნაწილი მაინც დანიელსონის დოკუმენტს ხელს მოაწერს.

„კარგია, რომ „ქართულმა ოცნებამ” ეს გადაწყვეტილება მიიღო. სჯობდა, აქამდეც მიეღო და ეს ყველაფერი ამდენი ხანი არ გაგრძელებულიყო. იმედია, ოპოზიციური პარტიები მთლიანად თუ არა ნაწილობრივ მაინც გაითვალისწინებენ ამის მნიშვნელობას, დოკუმენტს ხელს მოაწერენ და პარლამენტში შემოვლენ. ამ დოკუმენტში არის ჩანაწერი, რომ 20 ივნისზე ამნისტია უნდა მოხდეს, რასაც მივესალმები. ამნისტია არის სწორი. ასევე სხვა პუნქტები ეხება ინსტიტუციურ წინსვლას. დოკუმენტში საუბარი არ არის რიგგარეშე არჩევნებზე, ეს იმას ნიშნავს, რომ პოლიტიკური პროცესი პარლამენტში უნდა გაგრძელდეს. ჩვენ თავიდანვე ვთქვით, რომ დოკუმენტზე ხელის მოწერის მზაობა გვაქვს. მახსოვს, გიგა ბოკერიას განცხადება, რომ ყველამ რომ ხელი მოაწეროს დოკუმენტს, ის მაინც არ მოაწერს. ვფიქრობ, დოკუმენტს ნაწილი ხელს მოაწერს, ნაწილი თავისი მოთხოვნის ერთგული დარჩება და რიგგარეშე არჩევნებს მოითხოვს. ეს არის დათმობა და არ ვიტყვი, რომ ცუდია. კარგია, რომ დათმობაზე წავიდნენ და საქართველოში პოლიტიკური სიტუაციის სიმძიმე გაიაზრეს. არ მინდა, ნიშნის მოგებით ვისაუბრო, რადგან ვხედავ კომპრომისს და ამას მივესალმები. არ გამოვრიცხავ, რომ ამ გადაწყვეტილების მიღებასთან საერთო ჰქონდეს ირაკლი კობახიძის ამერიკაში ვიზიტს, მაგრამ ამერიკელი მეგობრებისგან გვესმოდა, რომ ორმხრივი კომპრომისი იყო ერთადერთი გამოსავალი და ამ მიმართულებით არის ნაბიჯი გადადგმული“, – განაცხადა ლევან იოსელიანმა.

„ქართული ოცნება“ ევროპული საბჭოს პრეზიდენტის, შარლ მიშელის პირადი წარმომადგენლის, კრისტიან დანიელსონის მიერ წარმოდგენილ დოკუმენტს ხელს აწერს.