სერგო ჩიხლაძე: ის, რაც არჩილ თალაკვაძემ გააჟღერა, შეთანხმების მისაღწევად საკმარისი არ არის

„სტრატეგია აღმაშენებლის“ წევრის სერგო ჩიხლაძის განცხადებით, „ქართული ოცნების“ მხრიდან მედიატორებისშედგენილ დოკუმენტზე ხელმოწერა შეთანხმებისთვის საკმარისი არ არის და ეს მხოლოდ დასტურია, რომ მმართველი გუნდი მოლაპარაკების გასაგრძელებლად მზადაა.

მისივე თქმით, დოკუმენტთან დაკავშირებით კითხვის ნიშნები ჩნდება როგორც „პოლიტპატიმრების“, ასევე ვადამდელი არჩევნების საკითხთან დაკავშირებით.

„არჩილ თალაკვაძის განცხადებას სჭირდება დეტალური ანალიზი. კონსულტაციები გვექნება სხვა ოპოზიციურ პარტიებთან, თუმცა რამდენიმე კითხვა მაქვს. რა უშლიდათ ხელს, მაშინაც რომ არსებული დოკუმენტისთვის თუნდაც ამ საკითხებზე დათანხმებულიყვნენ? ასევე ბევრი კითხვის ნიშანი რჩება პოლიტპატიმრებთან დაკავშირებით - რა მექანიზმით მოხდება ორივე პატიმრის გამოშვება? რაც შეეხება თვითმმართველობის არჩევნების 40%-ზე მიბმას, ეს დანიელსონის დოკუმენტში არ წერია, შესაბამისად, ეს პუნქტია ჩასამატებელი, ოღონდ ამაზეც სამსჯელოა. 40% თვითმმართველობის არჩევნებზე ძალიან პატარა ზღურბლია. ჩვენნაირ ქვეყნებში ადგილობრივ არჩევნებზე 40% რომ ვერ მიიღოს, მითუმეტეს ასეთი მეთოდებით, ხელისუფლება მკვდარი უნდა იყოს. ამიტომ 40% სადებატო თემა უნდა იყოს. ამასთანავე, საპარლამენტო არჩევნების ადგილობრივ არჩევნებზე მიბმა და თან 40%-ით, ბევრ კითხვის ნიშანს აჩენს, თუმცა ნებისმიერ შემთხვევაში დეტალურად განვიხილავთ ყველა ამ წინადადებას. ამაზე ზედაპირულად ვერ ვიმსჯელებთ, მოლაპარაკების მაგიდაზე უნდა განვიხილოთ“, - განაცხადა ჩიხლაძემ.

მისივე შეფასებით, ეს განცხადება მოლაპარაკების გაგრძელების შანსს აჩენს, დანარჩენი საკითხები კი მხარეებმა მოლაპარაკებებზე პირისპირ უნდა გაიარონ.

„ეს განცხადება მეტყველებს იმაზე, რომ „ქართული ოცნება“ მზადაა მოლაპარაკების გაგრძელებისთვის, რისთვისაც ჩვენც მზად ვართ. ის, რაც თალაკვაძემ გააჟღერა, შეთანხმების მისაღწევად საკმარისი არ არის. ეს განცხადება შეგვიძლია ჩავთვალოთ დასტურად, რომ მოლაპარაკებები გაგრძელდება“, - განაცხადა ჩიხლაძემ.

„ქართული ოცნება“ ევროპული საბჭოს პრეზიდენტის, შარლ მიშელის პირადი წარმომადგენლის, კრისტიან დანიელსონის მიერ წარმოდგენილ დოკუმენტს ხელს აწერს.