სალომე ზურაბიშვილმა შარლ მიშელს ბათუმში ასოცირების სამიტის ჩატარება შესთავაზა

ძალიან მნიშვნელოვანია, რომ ასოცირებამ მიიღოს თავისი სრულყოფილი სახე უკრაინასა და მოლდოვასთან ერთად, - ამის შესახებ სალომე ზურაბიშვილმა ევროპული საბჭოს პრეზიდენტთან, შარლ მიშელთან შეხვედრის შემდეგ განაცხადა. საქართველოს პრეზიდენტის თქმით, მან შარლ მიშელს ბათუმში ასოცირების სამიტის ჩატარება შესთავაზა.

„მე შევთავაზე ბატონ პრეზიდენტს, რომ ივლისში, როცა ჩვენი ბათუმის უკვე ცნობილი კონფერენცია ტარდება ევროკავშირთან, ეს კონფერენცია გადაიქცეს ასოცირების სამიტად და დავპატიჟოთ უკრაინისა და მოლდოვის პრეზიდენტები ევროკავშირთან ერთად და ერთად ვიმსჯელოთ, თუ რა ფორმა შეიძლება მიიღოს ამ ფორმატმა, რომელიც ამ სამ ქვეყანასა და ევროკავშირს გვაკავშირებს და აქვს დიდი მომავალი“, - აღნიშნა ზურაბიშვილმა.

მისივე თქმით, შეხვედრაზე მხარეებმა აღმოსავლეთ პარტნიორობის სამიტზეც ისაუბრებს.

„ეს ორი (ფორმატი) ერთმანეთს ავსებს და ორივე სრულყოფილად უნდა ავამოქმედოთ და ავამოქმედოთ ისე, რომ ამით რეგიონში შემოვიტანოთ მეტი სტაბილურობა და მეტი ეკონომიკური განვითარება. ამაში ჩვენი და ევროკავშირის ინტერესიც დევს, არა მხოლოდ ჩვენ მიმართ, არამედ მთლიანად რეგიონის მიმართ. ასევე მნიშვნელოვანია განვავითაროთ ის პროგრამები, რომელიც ფიზიკურად ადამიანებს აკავშირებს და აახლოებს ერთმანეთთან. კულტურა და განათლება არის ის ორი მიმართულება, სადაც საქართველო უნდა წავიდეს შორს და მაქსიმალურად უნდა გამოვიყენოთ ყველა შესაძლებლობა, რომ ჩვენმა და ევროკავშირის მოქალაქეებმა იგრძნონ, რომ ნამდვილად ერთ ოჯახს ეკუთვნიან!“ - აღნიშნა ზურაბიშვილმა.

დღესვე შარლ მიშელისა და საქართველოს პრემიერ-მინისტრის, ირაკლი ღარიბაშვილის პირისპირ შეხვედრა გაიმართება. ამასთანავე, ვიზიტის ფარგლებში ევროპული საბჭოს პრეზიდენტი პარლამენტის თავმჯდომარეს, არჩილ თალკვაძესა და პოლიტიკური პარტიების წარმომადგენლებს პარლამენტში შეხვდება. დღის ბოლოს სალომე ზურაბიშვილის სახელით ბატონ შარლ მიშელის პატივსაცემად სადილი გაიმართება.

შარლ მიშელის მიერ წარდგენილ დოკუმენტს - „საქართველოს წინსვლის გზა“ პარტიებმა ხელი ოფიციალურად 19 აპრილს მოაწერეს.