გურამ მაჭარაშვილი: პრინციპულად ვიცავთ პოზიციას, რომ „ამნისტიის შესახებ კანონპროექტი“ ერთობლივად დაინიცირდეს

გვაქვს მოლოდინი, რომ ჩვენი საერთაშორისო პარტნიორები კიდევ ერთხელ შეახსენებენ ოპონენტებს, რომ ეს არ არის ის საკითხი, რომელზეც შესაძლებელია, მუდმივად იკამათონ, - ამის შესახებ საპარლამენტო უმრავლესობის წევრმა გურამ მაჭარაშვილმა ჟურნალისტებს „ამნისტიის შესახებ კანონპროექტზე“ საუბრისას განუცხადა.

„პრინციპულად ვიცავთ იმ პოზიციას, რაც წერია შეთანხმებაში, რომ „ამნისტიის შესახებ კანონპროექტი“ ერთობლივად დაინიცირდეს. ეს არა მხოლოდ იმის გამო, რომ „ქართულ ოცნებას“ ასე სურს, არამედ გვსურს, საზოგადოებას კიდევ ერთხელ შევახსენოთ, რომ ეს ჩვენი ევროპელი კოლეგების შემოთავაზებაა.

გვაქვს მოლოდინი და იმედი, რომ ჩვენი საერთაშორისო პარტნიორები კიდევ ერთხელ შეახსენებენ ოპონენტებს, რომ ეს არ არის ის საკითხი, რომელზეც შესაძლებელია, მუდმივად იკამათონ და კითხვის ნიშნის ქვეშ დააყენონ“, - განაცხადა მაჭარაშვილმა.

ოპოზიციონერ დეპუტატებს შორის ამნისტიის საკითხზე აზრთა სხვადასხვაობაა. ნაწილი ფიქრობს, რომ კანონპროექტის მიღება ოპტიმალური გამოსავალია, სხვების აზრით კი, ის არ უნდა შეეხოს ყველას, ვინც 2019 წლის 19-20 ივნისის მოვლენების გამო სასჯელს იხდის.